சூரி நாயகனாக நடிக்கும் ‘மாமன்’ முதல் பார்வை போஸ்டர் வெளியானது!
Friday January-17 2025

‘கருடன்’ வெற்றியை தொடர்ந்து நடிகர் சூரி மற்றும் தயாரிப்பாளர் கே.குமார் இரண்டாவது முறையாக இணைந்துள்ளதாலும், மிகப்பெரிய வெற்றி பெற்ற ‘விலங்கு’ இணையத் தொடரை இயக்கிய பிரசாந்த் பாண்டியராஜ் இயக்கும் படம் என்பதாலும் ’மாமன்’ படம் அறிவிக்கப்பட்ட நாள் முதல் மிகப்பெரிய எதிர்பார்ப்பை ஏற்படுத்திய நிலையில், இன்று படத்தின் முதல் பார்வை போஸ்டரை படக்குழு வெளியிட்டுள்ளது.

சூரி நாயகனாக நடிக்கும் இப்படத்தில் அவருக்கு ஜோடியாக ஐஸ்வர்யா லட்சுமி நடிக்கிறார். இவர்களுடன் ராஜ்கிரண், ஜெயபிரகாஷ், பாபா பாஸ்கர், விஜி சந்திரசேகர், பாலசரவணன், கீதா கைலாசம், நிகிலா சங்கர், மாஸ்டர் பிரகீத் சிவன் உள்ளிட்ட பலர் நடிக்கிறார்கள். 

தினேஷ் புருஷோத்தமன் ஒளிப்பதிவு செய்து வரும் இந்த திரைப்படத்திற்கு ஹேஷாம் அப்துல் வஹாப் இசையமைக்கிறார். படத்தொகுப்பு பணிகளை கணேஷ் சிவா மேற்கொள்ள, கலை இயக்கத்தை ஜி. துரை ராஜ் கவனிக்கிறார். தாய் மாமன் உறவைப் பற்றி மண் மணம் கமழும் படைப்பாக தயாராகும் இந்த திரைப்படத்தை லார்க் ஸ்டுடியோஸ் நிறுவனம் சார்பில் தயாரிப்பாளர் கே. குமார் தயாரிக்கிறார். 

இப்படத்தைப் பற்றி இயக்குநர் பேசுகையில், ”ஆறு வயது சிறுவனுக்கும், அவருடைய தாய் மாமனுக்கும் இடையேயான உறவை உணர்வுபூர்வமாக பேசும் படைப்பாக இப்படம் தயாராகி வருகிறது. அனைத்து தரப்பு ரசிகர்களும் குடும்பத்தினருடன் திரையரங்கத்திற்கு வருகை தந்து ரசிக்கும் வகையில் ஃபேமிலி என்டர்டெய்னராக 'மாமன்' உருவாகி வருகிறது”  என்றார். 

இந்த படத்தின் படப்பிடிப்பு தற்போது திருச்சி மற்றும் அதனை சுற்றியுள்ள பகுதிகளின் விறுவிறுப்பாக நடைபெற்று வருகிறது. இந்நிலையில் இப்படத்தின் பர்ஸ்ட் லுக் வெளியிடப்பட்டுள்ளது. இதில் சூரியின் தோற்றம் ரசிகர்களின் கவனத்தை கவர்ந்திருக்கிறது. மேலும் இந்த திரைப்படம் எதிர்வரும் கோடை விடுமுறையில் வெளியிட திட்டமிடப்பட்டு வருவதாக படக்குழுவினர் மகிழ்ச்சியுடன் தெரிவித்துள்ளனர்.