‘ஹேப்பி ராஜ்’ போன்ற குடும்பக் கதைகள் தான் இன்று தேவை – விஜய் சேதுபதி
Tuesday March-17 2026

ஜெயவர்தன் தயாரிப்பில், மரியா இளஞ்செழியன் இயக்கத்தில், ஜிவி பிரகாஷ் குமார் நடிப்பில் உருவாகியுள்ள ’ஹேப்பி ராஜ்’ திரைப்படம் வரும் மார்ச் 27 ஆம் தேதி திரையரங்குகளில் வெளியாக உள்ள நிலையில், வெளியீட்டுக்கு முந்த நிகழ்ச்சி நேற்று மாலை சென்னையில் நடைபெற்றது. இதில், நடிகர்கள் விஜய் சேதுபதி, கவின், தயாரிப்பாளர்கள் சங்க தலைவர் ஜி.கே.எம்.தமிழ் குமரன் உள்ளிட்ட ஏராளமான திரையுலக பிரபலங்கள் சிறப்பு விருந்தினர்களாக கலந்து கொண்டார்கள். 

 

நிகழ்ச்சியில் நடிகர் விஜய் சேதுபதி பேசுகையில், “எல்லாருக்கும் வணக்கம். முதலாவதாக, தயாரிப்பாளர் சங்கத்தில் வெற்றி பெற்றுள்ள தமிழ்குமரன் சார் மற்றும் அவருடைய அணியினருக்கு என்னுடைய வாழ்த்துக்கள். சார், அது நமக்கெல்லாம் செட் ஆகாது சார். ஏன் வேண்டாம் என்று சொன்னேனென்றால், ஏதாவது பஞ்சாயத்து என்று உட்கார்ந்து, அதில் தீர்ப்பு வழங்கப் போய், பின்னர் நம்முடைய படத்துக்கு ஏதாவது பாதிப்பு ஏற்பட்டு விடுமோ என்ற பயத்தில் நான் வேண்டாம் என்று சொன்னேன். மேலும், ஒரு பொறுப்பு கொடுத்தால் அதை முழு பொறுப்புடன் செய்ய வேண்டும். அப்படி செய்தால் பின்னர் பல விஷயங்கள் உருவாகலாம் என்பதால் நான் அந்த பொறுப்பை ஏற்கவில்லை. ஆனால் நீங்கள் வெற்றி பெற்றது எனக்கு மிகவும் மகிழ்ச்சி அளிக்கிறது. வாழ்த்துக்கள் சார்.

 

பியாண்ட் பிக்சர்ஸ் அணியினரிடம் இருந்து நான் ஆரம்பிக்கிறேன். மிகவும் அழகாக பேசினீர்கள். எந்த புதிய தயாரிப்பாளர் வந்தாலும் ‘வருக, வருக’ என்று வரவேற்க வேண்டும். சினிமா ஒரு அற்புதமான தொழில். யாரும் பயப்பட வேண்டாம். இது ஒரு ஆலோசனை அல்ல, என் அனுபவம். ஒரு இயக்குநர் எப்படி படித்து வளர்கிறாரோ, ஒரு நடிகர் எப்படி கற்றுக்கொள்கிறாரோ, அதேபோல் தயாரிப்பாளரும் வியாபாரம் மற்றும் ஸ்கிரிப்ட் ஆகியவற்றை கற்றுக்கொண்டால் மிகவும் நல்லது. நீங்கள் எல்லோரும் இளைஞர்கள், நன்றாக கற்றுக்கொள்ளுங்கள். நிறைய படங்கள் தயாரியுங்கள்.

 

இந்தப் படத்தில் மரியா அவர்களுக்கு வாய்ப்பு அளித்ததற்கு நன்றி. வாழ்த்துக்கள் மரியா. ட்ரெய்லர் மிகவும் நன்றாக இருந்தது. மிகவும் சந்தோஷமாகவும் சுவாரஸ்யமாகவும் இருந்தது. ‘ஹேப்பி ராஜ்’ என்ற தலைப்பிலேயே ஒரு சந்தோஷம் உள்ளது. ட்ரெய்லர் பார்க்கும்போது அது மிகவும் இனிமையாக இருந்தது. நம்ம ஜி.வி. பிரகாஷ் குமார் எப்போதும் ஒரு பள்ளி மாணவன் போலவே நடிக்க முடியும் போல இருக்கிறது. எந்த காலகட்டத்திலும் அவர் அதே இளமையோடு தோன்றுகிறார். மிகவும் நன்றாக இருந்தது, எனக்கு மிகவும் பிடித்திருந்தது. வாழ்த்துக்கள். மரியம் அண்ணா, நீங்கள் மிகவும் அழகாக இருக்கிறீர்கள். எனக்கு உங்களை மிகவும் பிடிக்கும். அதேபோல் ஜஸ்டின் பிரபாகரன் குறித்து சொல்ல வேண்டும். எனக்கு அவர் மிகவும் நெருக்கமானவர். அவருடைய பணியை நான் மிகவும் விரும்புகிறேன். ‘பண்ணையாரும் பத்மினியும்’ படம் முதல் அவருடன் பழக்கம் உள்ளது. ‘சர்வம் தாள மயம்’, ‘நீலோற்பம்’ போன்ற படங்களில் அவர் அசாதாரணமான இசையமைப்பாளராக திகழ்ந்துள்ளார். அவர் இன்னும் பெரிய உயரத்தை அடைவார் என நம்புகிறேன். அவரை நான் மிகவும் நேசிக்கிறேன். கௌரி, உங்களுக்கு என்னுடைய வாழ்த்துக்கள். எல்லோருக்கும் என்னுடைய வாழ்த்துக்கள்.” என்றார்.

 

இயக்குநர் மரியா இளஞ்செழியன் பேசுகையில், “அனைவருக்கும் இனிய மாலை வணக்கம். முதலில் என் பெயர் மரியா இளஞ்செழியன் தான். ‘ராஜா’ என்பது என் அப்பாவின் பெயர். அப்பா இங்கு இருக்கிறார்... அதனால் முதலில் அப்பாவிடமிருந்தே ஆரம்பிக்கலாம். ஏனெனில் என்னை முறைத்துக் கொண்டே இருந்தார். அவருக்கு கதை எதுவும் தெரியாது. சில நாட்களுக்கு முன் ‘துரு துரு’ பாடல் வெளியானது. எல்லா குடும்ப WhatsApp குழுக்களிலும் ‘என்னுடைய மகன்’ என்று பெருமையாக பகிர்ந்து கொண்டிருந்தார். இங்கு டிரெய்லரில் கடைசி காட்சியை பார்த்ததும் நான் அப்பாவைப் பார்த்தேன், அவர் என்னை முறைத்துக் கொண்டே இருந்தார். அதனால் அவரிடமிருந்தே ஆரம்பிக்கிறேன். நன்றிப்பா. அம்மாவும் வந்திருக்கிறார், நன்றி மா. குடும்பத்தினர் அனைவரும் வந்திருக்கிறார்கள்.

 

அடுத்து என் இயக்குநர் பிரதீப் ரங்கநாதன் அவர்களுக்கு நன்றி சொல்ல வேண்டும். கடந்த ஐந்து ஆண்டுகளாக அவருடன் பயணம் செய்துள்ளேன். அவரிடமிருந்து நிறைய கற்றுக் கொண்டேன். அது இங்கு பிரதிபலிக்கிறது. நாங்கள் அனைவரும் ஒரு அணியாக வேலை செய்தோம். மீண்டும் அவருக்கு ஒரு சிறப்பு நன்றி. என் படத்திற்காக முதல் ப்ரோமோ செய்தோம். அவர் ப்ரோமோ செய்வாரா என்று எனக்கு ஆச்சரியமாக இருந்தது. தயக்கத்துடன் கேட்டேன். ஆனால் அவர் மிகவும் நன்றாக செய்து கொடுத்தார். நான் அதை எதிர்பார்க்கவில்லை. அவர் பொதுவாக யாருக்கும் இப்படிச் செய்ய மாட்டார். இன்று அவர் பெரிய ஹீரோவாக தொடர்ந்து வெற்றிகளை வழங்கி வருகிறார். அவருடன் திரையைப் பகிர்ந்தது எனக்கு பெருமையாக உள்ளது. நன்றி பிரதீப் ப்ரோ. இன்று அவர் வர முடியவில்லை, ஆனால் அணியினருக்கு தனது வாழ்த்துகளை தெரிவித்தார்.

 

அதன்பிறகு என் ஹீரோ ஜி.வி. பிரகாஷ் குமார் சார், நன்றி சார். கதை முடிந்தபின் யாரை தேர்வு செய்வது என்று யோசித்தபோது ஆரம்பத்தில் வாய்ப்புகள் கிடைக்கவில்லை. அது ஒரு சிரமமான நேரமாக இருந்தது. அப்போது ஜி.வி சார் அவர்களின் எண்ணை பெற்று ஒரு மெசேஜ் அனுப்பினேன். உடனே பதில் வந்தது. அது எனக்கு ஆச்சரியமாக இருந்தது. பின்னர் அவர் Pitch Deck கேட்டார். அனுப்பியதும் சந்திப்பு கொடுத்து கதை கேட்டார். நான் சொன்ன கதையை மிகவும் ரசித்த ஒரே ஹீரோ ஜி.வி சார் தான்.

 

அவர் எல்லோருக்கும் உடனடியாக பதில் அளிப்பவர். அந்த ஒரு பதில் தான் இன்று எனக்கு ஒரு வாழ்க்கையை உருவாக்கியது. மிகவும் நன்றி சார். புதிய இயக்குநர்களுக்கு அவர் தொடர்ந்து வாய்ப்பு அளித்து வருகிறார். அதனால் இந்த படத்தை அவருக்காக 200% அர்ப்பணிப்புடன் செய்ய வேண்டும் என்று முடிவு செய்தேன். அவரின் தோற்றம் முதல் நடிப்பு வரை முழுமையாக உழைத்து இந்த படத்தை உருவாக்கினோம். என்றும் நன்றியுடன் இருப்பேன்.

 

அடுத்து தயாரிப்பாளர்கள் ஜெயவர்தன் ப்ரோ, ஜெய் ப்ரோ ஆகியோருக்கு நன்றி. அவர்களின் நேர்மறை எண்ணமும் ஆர்வமும் இந்த படத்தின் வெற்றிக்கு முக்கிய காரணம். இன்று சென்னை மற்றும் தமிழ்நாடு முழுவதும் இந்த படத்தின் ப்ரொமோஷன் நடைபெற்று வருகிறது. ஜெய் ப்ரோ தினமும் பலமுறை என்னை தொடர்பு கொள்வார். ஜெயவர்தன் ப்ரோ மிகவும் நேர்மறையான நபர். அவர்களுக்கும் நன்றி.

 

இந்த படத்தின் நாயகி கௌரி மேடம். அவரை தேர்வு செய்வதில் ஆரம்பத்தில் தயக்கம் இருந்தது. ஆனால், கதை கேட்டவுடன் அவருக்கு மிகவும் பிடித்தது, சிறப்பாக நடித்துள்ளார். ‘லவ்வர்’ படத்தை விட இதில் ஒரு காட்சியில் அவரை மிகவும் உணர்ச்சிவசப்பட வைத்துள்ளேன்.

அதேபோல் அப்பாஸ் சார் இந்த படத்தில் இணைந்தது மிகப்பெரிய பலமாக அமைந்தது. அவரை கொண்டு வர வேண்டும் என்ற யோசனையை வழங்கிய எங்கள் EP விஷ்ரத் அவர்களுக்கும் நன்றி.” என்றார்.

 

நடிகர் ஜி.வி. பிரகாஷ் குமார் பேசுகையில், “பிரஸ், மீடியா அனைவருக்கும் வணக்கம். ரொம்ப நேரம் உங்களை காத்திருக்க வைத்தோம்... உங்கள் பொறுமைக்கு நன்றி. மிகவும் குளிராக உள்ளது. ஒரு ஸ்வெட்டர் எடுத்துக் கொண்டு வர மறந்துவிட்டேன் என்று நினைக்கிறேன். தெரிந்திருந்தால் எடுத்துக் கொண்டு வந்திருப்பேன். லேசாக பசியும் இருக்கிறது. மரியா எப்படி சொல்வது... ஒரு முதல் முறையாக வரும் திறமை. பயமின்றி (Fearless) இருக்கிறார். ‘ரோர்’, ‘ரைஸ்’... என்னடா ‘ஆர்.ஆர்.ஆர்’ படத்தின் டைட்டில்களைச் சொல்கிறேன்! அந்த பயமற்ற தன்மையோடு அவர் ஒரு மெசேஜ் அனுப்பினார். ‘சாட் ஜிபிடி மாதிரி ஒருவரை கண்டுபிடித்துவிட்டேன்’ என்றார். உண்மையாகவே இப்படிப்பட்ட ஒருவர் ஒரு படத்தை உருவாக்குவாரானால், அவருக்கு நான் ‘சாட் ஜிபிடி’ ஆக இருக்க விரும்புகிறேன்.

 

‘த்ரிஷா இல்லனா நயன்தாரா’ படத்தில் இருந்த ஒரு எனர்ஜி இருக்கும். ஆனால் அது ஒரு ‘A’ சர்ட்டிஃபிகேட் படமாக இருந்தது. அந்த எனர்ஜியை எடுத்துக்கொண்டு, குடும்பம் மற்றும் நண்பர்கள் எல்லாரும் பார்க்கக்கூடிய ஒரு ஜாலியான படமாக இந்த படத்தை உருவாக்கியுள்ளார். ஒரு இயக்குநர் மற்றும் நடிகர் இடையே நல்ல இணைப்பு இருந்தால்தான் படம் வெற்றி பெறும். அந்த இணைப்பு எனக்கும் மரியாவுக்கும் மிகவும் நன்றாக இருந்தது. கதை சொல்லியபோது தயாரிப்பாளர்கள் கிடைக்கவில்லை. பின்னர் ஜெயவர்தன் மற்றும் ஜெய்காந்த் ஆகியோர் இணைந்தனர். ஆரம்பத்தில் ஒரு பயம் இருந்தது. ஆனால் அவர்கள் மிகவும் நம்பிக்கையுடன் ‘படத்தை முடிப்போம்’ என்று கூறினர். உண்மையிலேயே அவர்கள் படத்தை முடித்து, ரிலீஸ்க்கு தயாராக வைத்ததுடன், OTT மற்றும் Satellite உள்ளிட்ட அனைத்து வணிகங்களையும் முடித்துவிட்டனர். ஒரு லாபகரமான படமாக இதை உருவாக்கியுள்ளனர். அதற்காக அவர்களுக்கு என் மனமார்ந்த நன்றி.

 

மரியம் ஜார்ஜ் சார் குறித்து பேச வேண்டும். சிலர் ‘இந்த கதாபாத்திரத்திற்காகவே இவர் பிறந்தவர்’ என்று சொல்வார்கள். அதுபோல இந்த படத்திற்காகவே அவர் பொருத்தமானவர். ஒரு தேசிய விருது பெற்ற முன்னணி நடிகரே அவரின் நடிப்பைப் பார்த்து பாராட்டியுள்ளார். இந்த படத்தை பார்த்த பிறகு ஜார்ஜ் சார் உங்கள் மனதில் நீங்காதவர் ஆகிவிடுவார். இந்த படம் அனைத்து தந்தைகளுக்கும் அர்ப்பணிக்கப்பட்டதாகும். அப்பாஸ் சார் இந்த படத்தில் இணைந்தது மிகவும் முக்கியமானது. இந்த படம் அவருக்கு ஒரு சிறந்த கம்பேக் ஆக அமைய வேண்டும் என்று நான் நினைக்கிறேன். அவர் ஒரு சிறந்த மனிதர். அவரிடம் இன்னும் ஒரு நிர்ப்பாவமும், சினிமாவிற்கான ஆர்வமும் இருக்கிறது. அவருடன் கழித்த நாட்களை நான் மறக்க மாட்டேன்.

 

கௌரி மிகவும் சிறப்பாக நடித்துள்ளார். இயல்பான நடிப்பு, நம்பிக்கையான திரை முன்னிலை... அவருடன் வேலை செய்தது மிகவும் மகிழ்ச்சி. எதிர்காலத்தில் அனைத்து விருதுகளிலும் அவரை பார்க்கலாம் என்று நம்புகிறேன். பிரார்த்தனா ஒரு ‘லக்கி சார்ம்’ போல இருக்கிறார். அவர் நடித்த படங்கள் அனைத்தும் வெற்றி பெறுகின்றன. இந்த படத்திற்கும் அந்த அதிர்ஷ்டத்தை கொண்டு வந்துள்ளார். ஜஸ்டின் மிக அழகான பாடல்களை வழங்கியுள்ளார். குறிப்பாக டான்ஸ் பாடலிலும் சிறப்பாக சாதித்துள்ளார். தற்போது அவர் தொடும் அனைத்தும் வெற்றியாக மாறுகிறது. மணி, முதல் படமாகவே இன்டர்வல் பகுதியில் சிறப்பான நடன அமைப்பை வழங்கியுள்ளார். அது மிகவும் ஆச்சரியப்படுத்தியது. அவருக்கு எதிர்காலத்தில் பல விருதுகள் கிடைக்கும்.

 

கானா வினோத், இந்த படத்தை முழுமையாக ப்ரொமோட் செய்ததற்கு நன்றி. வியாக்கி, ஒவ்வொரு போஸ்டரையும் மிகவும் சிறப்பாக வடிவமைத்துள்ளார். ஒளிப்பதிவாளர் மதன் மற்றும் அவரது அணியினர் அழகான காட்சிகளை வழங்கியுள்ளனர். ஆர்ட் டைரக்டர், பிரவீன் மற்றும் அனைத்து தொழில்நுட்ப கலைஞர்களுக்கும் என் நன்றி. பாடலாசிரியர் கார்த்திக் நேத்தாவுக்கும் நன்றி. அனைத்து உதவி இயக்குநர்களும் மிகுந்த உழைப்புடன் பணியாற்றியுள்ளனர். அவர்கள் அனைவரும் சிறந்த நடிகர்களாக மாறுவார்கள் என்று நினைக்கிறேன்.

 

முழு படக்குழுவுக்கும் என் நன்றி. இந்த படம் உங்களை ஏமாற்றாது. இது உங்களை சிரிக்கவும், அழ வைக்கவும், உணர்ச்சிவசப்படுத்தவும் செய்யும். குறிப்பாக தந்தை-மகன் உறவை நினைவூட்டும் ஒரு படமாக இருக்கும்.” என்றார்.

 

நடிகர் கவின் பேசுகையில், “எல்லாருக்கும் வணக்கம். சாதாரணமாகவே மேடைக்கு வந்தால் நடுக்கம் இருக்கும்... இல்லையென்றால் மிகவும் குளிராக உள்ளது. எனக்கு மட்டும்தானா அல்லது எல்லாருக்கும் குளிராக இருக்கிறதா? எல்லாருக்கும் என்றால் சரி. இல்லையெனில் மருத்துவரை பார்க்க வேண்டியிருக்கும், நம்ம உடலில்தான் பிரச்சனை என்று நினைத்தேன். முதலில் அழைத்ததற்கு மிகவும் நன்றி. பொதுவாக சில நிகழ்ச்சிகளுக்கு செல்லும்போதே அங்குள்ள ஒரு ‘வைப்’ மூலம் அந்த படம் எப்படி இருக்கும், எங்கு செல்லும் என்று ஒரு உணர்வு கிடைக்கும். சில நேரங்களில் மேடையில் பேசுவது வழக்கமாக இருக்கும். ஆனால் சில இடங்களில் அது உண்மையாக உணரப்படும். இன்று அந்த உணர்வு எனக்கு கிடைத்துள்ளது. இந்த அணியில் உள்ள அனைவரும் எவ்வளவு ஈடுபாட்டுடன் வேலை செய்திருக்கிறார்கள் என்பது தெரிகிறது.

 

இந்த படத்தைப் பற்றி ஆரம்பத்தில் எனக்கு எதுவும் தெரியாது. ‘ஹேப்பி ராஜ்’ டீசரை முதலில் பார்த்தேன். அதை பார்த்தபோது ‘லவ் டுடே’ ட்ரெய்லர் பார்த்தபோது கிடைத்த அதே மாதிரியான ஒரு சக்தி இருந்தது. அந்த மாதிரி ஒரு நல்ல எனர்ஜி இந்த படத்திலும் இருப்பது தெளிவாக தெரிகிறது. இயக்குநர் பிரதீப் ரங்கநாதன் அவர்களின் அணியில் இருந்து வந்தவர் என்பதால் அந்த தாக்கம் தெரிகிறது.

 

இந்த படத்தில் எனக்கு மிகவும் பிடித்த பலரும் நடித்துள்ளனர். குறிப்பாக ஜி.வி. பிரகாஷ் குமார் சார் உள்ளிட்ட பலர் உள்ளனர். அதிர்ச்சி அருண் போன்றவர்களை நான் மிகவும் விரும்பி பார்த்துள்ளேன். அவர்களுடன் இந்த படத்தில் இருப்பது மகிழ்ச்சியாக உள்ளது.

ஒரு படம் வெற்றி பெறுவதில் முக்கியமானது சரியான ‘காஸ்டிங்’ என்று பலர் கூறுவார்கள். ஒரு இயக்குநர் நினைப்பதை நடிகர்கள் மூலம் தான் வெளிப்படுத்த முடியும். அதனால் சரியான தேர்வு இருந்தால் படம் பாதி வெற்றி அடைந்தது போல. இந்த படத்தில் அந்த தேர்வு மிகவும் சிறப்பாக உள்ளது என்று நினைக்கிறேன். ஜி.வி சார் மிகவும் நல்ல லுக்கிலும் எனர்ஜியுடனும் இருக்கிறார். இப்படிப்பட்ட கதாபாத்திரங்களை தொடர்ந்து செய்ய வேண்டும் என்று நினைக்கிறேன். அவருடைய ‘ஸ்டைல்’ மிகவும் பிடித்திருந்தது.

கௌரி, உங்கள் ‘லவ்வர்’ படம் எனக்கு மிகவும் பிடித்தது. அதில் நீங்கள் மிகவும் நன்றாக நடித்திருந்தீர்கள். இந்த படத்திலும் சிறப்பாக நடித்திருப்பீர்கள் என்று நம்புகிறேன்.

 

இசையமைப்பாளர் ஜஸ்டின் அவர்களின் பாடல்கள் மிகவும் அழகாக உள்ளன. குறிப்பாக ‘நீலோற்பம்’ போன்ற மெலடி பாடல்களும், அதே நேரத்தில் ஒரு வேகமான டான்ஸ் பாடலும் வழங்கியிருப்பது அவரின் திறமையை காட்டுகிறது. மணி உள்ளிட்ட பலருக்கு இது முதல் படம் என்று நினைக்கிறேன். அவர்கள் அனைவரும் மிகுந்த முயற்சியுடன் வேலை செய்திருக்கிறார்கள். அந்த முயற்சி திரையில் கண்டிப்பாக வெளிப்படும் என்று நம்புகிறேன். இந்த அணியின் எனர்ஜி திரையிலும் பிரதிபலிக்கும். அனைவருக்கும் எனது மனமார்ந்த வாழ்த்துக்கள். இந்த படம் மிகுந்த வெற்றி பெற வேண்டும் என்று நான் இறைவனை வேண்டுகிறேன்.” என்றார்.

 

இசையமைப்பாளர் ஜஸ்டின் பிரபாகரன் பேசுகையில், “எல்லாருக்கும் வணக்கம். பத்திரிகையாளர்களுக்கும் வணக்கம். இந்த நிகழ்ச்சி மிகவும் மகிழ்ச்சியாக நடைபெற்று வருகிறது. நேரம் போவது கூட தெரியவில்லை. அனைவரும் மிகவும் நன்றாக பேசிக் கொண்டிருக்கிறார்கள். நன்றி. தயாரிப்பாளர்கள் ஜெய் மற்றும் ஜெயவர்தன் குறித்து சொல்ல வேண்டும். இவர்கள் இந்த துறையில் மிகவும் கூலான தயாரிப்பாளர்கள். மிகவும் எளிமையாகவும் சுலபமாகவும் பழகுவார்கள். ‘தயாரிப்பாளர்’ என்ற ஒரு தூர உணர்வு இல்லாமல் இருப்பார்கள். அதனால் இந்த படம் கண்டிப்பாக ஒரு நல்ல படமாக இருக்கும் என்று நம்புகிறேன்.

 

ஜி.வி. பிரகாஷ் குமார் சார், மிகவும் நன்றி. உங்களுடன் நான் பணிபுரியும் இரண்டாவது படம் இது. நீங்கள் மிகவும் பாசிட்டிவான நபர். அது செயற்கையாக அல்ல, இயல்பாக உங்களிடமிருந்து வரும் ஒரு ஆற்றல். அது அனைவருக்கும் உணரப்படுகிறது. உங்கள் படைப்புகளிலும், உங்களுடைய அணுகுமுறையிலும் அது தெரிகிறது. எப்போதும் உங்களை செயல்பாட்டில் வைத்திருக்கிறீர்கள். அது எனக்கு ஒரு பெரிய ஊக்கமாக உள்ளது. நீங்கள் நடித்த படங்களில் இந்த படம் ஒரு முக்கியமானதாக இருக்கும்.

 

மரியா, மிகவும் நன்றி. இந்தப் படம் உங்கள் வாழ்க்கையில் புதிய வாயில்களைத் திறக்கும். நீங்கள் இன்னும் பல தரமான படங்கள் செய்ய வேண்டும் என்று வாழ்த்துகிறேன். நீங்கள் நினைப்பது கண்டிப்பாக நடக்கும் என்று நம்புகிறேன். பின்னணி இசை (BGM) சிறப்பாக அமைந்துள்ளது. கார்த்திக் நேத்தா, சாரதி, விவேக் ஆகியோருக்கும் எனது நன்றிகள். நான் மிகவும் முக்கியமாகக் கருதுவது பாடல் வரிகள். எவ்வளவு நல்ல இசை அமைத்தாலும், சரியான வரிகள் இல்லையெனில் அது முழுமையடையாது. எனக்கு பிடித்த பல பாடலாசிரியர்களுடன் பணிபுரிந்துள்ளேன்.

 

மேலும் கங்கை அமரன் சார் உடன் இந்தப் படத்தில் பணியாற்றும் வாய்ப்பு கிடைத்தது எனக்கு மிகுந்த மகிழ்ச்சி. நீண்ட நாட்களாக இருந்த ஆசை இந்தப் படத்தின் மூலம் நிறைவேறியது. அதற்கு குழுவினருக்கும் நன்றி.

மரியம் சார், உங்கள் வேலை எனக்கு மிகவும் பிடிக்கும். இந்தப் படம் உங்களுக்கு ஒரு முக்கியமான படமாக இருக்கும். இந்தப் படத்தில் உள்ள அனைத்து நடிகர்களும் மிகவும் பொருத்தமாக தேர்ந்தெடுக்கப்பட்டுள்ளனர். ஜி.வி. பிரகாஷ் குமார் சார், கௌரி மேடம் உள்ளிட்ட அனைவரும் தங்கள் கதாபாத்திரத்திற்கு மிகவும் பொருத்தமாக நடித்துள்ளனர். நன்றி.

 

எடிட்டர் செல்வா மற்றும் கவின் சார் ஆகியோருக்கும் நன்றி. அவரை எப்போது சந்தித்தாலும் பல வருடங்கள் பழகியவர் போல ஒரு உணர்வு தருகிறார். மேலும் விஜய் சேதுபதி சார் இங்கு வந்து இந்த நிகழ்ச்சியை தொடங்கி வைத்ததற்கு நன்றி. கானா வினோத் அண்ணா, நான் அவரை ‘பிக் பாஸ்’ நிகழ்ச்சியில் இருந்து பார்த்து, ஒருநாள் அவருடன் பழக வேண்டும் என்று நினைத்தேன். இந்தப் படத்தில் அது சாத்தியமானது. நன்றி அண்ணா. மணிசந்திரா மாஸ்டர், மிகவும் நன்றி. ஒரு படத்தில் முழுமையாக பணியாற்றும் வாய்ப்பு கிடைப்பது இன்றைய காலத்தில் ஒரு பெரிய சாதனை. அது உங்களுக்கு கிடைத்துள்ளது மகிழ்ச்சி அளிக்கிறது. யாருடைய பெயரையும் தவறவிட்டிருந்தால் மன்னிக்கவும். அனைவருக்கும் என் நன்றிகள்.” என்றார்.

 

தயாரிப்பாளர் ஜெயவர்தன் பேசுகையில், “இங்கு வந்திருக்கும் அனைவருக்கும் எனது மாலை வணக்கம். முதலில், சிறப்பு விருந்தினராக வந்திருக்கும் விஜய் சேதுபதி சார் அவர்களுக்கு என் மனமார்ந்த நன்றி. எங்கள் விழாவிற்கு வருகை தந்தது எங்களுக்கு பெருமை.

அடுத்து, ஜி.வி. பிரகாஷ் குமார் சார், கௌரி மேம், ஜார்ஜ் மரியன் சார் ஆகியோரையும் வரவேற்கிறேன். மேலும் இங்கு வந்திருக்கும் பிரஸ், மீடியா, குடும்பத்தினர், நண்பர்கள், விநியோகஸ்தர்கள் மற்றும் தொழில் பங்குதாரர்கள் அனைவருக்கும் என் மனமார்ந்த வாழ்த்துக்கள்.

 

இந்த நேரத்தில் சில முக்கியமானவர்களுக்கு நான் நன்றி தெரிவிக்க விரும்புகிறேன். அவர்களின் ஆதரவால் தான் இந்தப் படத்தை விரைவாக முடித்து நல்ல தேதியில் வெளியிட முடிந்தது. முதலில் AB International குழுமத் தலைவர் திரு. சஞ்சய் வாத்வா அவர்களுக்கு நன்றி. அவருடன் வந்திருக்கும் நிறுவனத்தின் சி.இ.ஓ திரு. பிரிஜேஷ் மற்றும் ரக்ஷிதா மேம் ஆகியோருக்கும் நன்றி.

 

தமிழ்நாட்டில் திரையரங்க வெளியீட்டு உரிமையை பெற்றுள்ள ஃபைவ் ஸ்டார் செந்தில் சார் அவர்களுக்கு என் நன்றி. அவர் ஒரு அனுபவமிக்க, சினிமாவுக்கு பேராசை கொண்ட விநியோகஸ்தர். ‘ஹேப்பி ராஜ்’ படத்தை தமிழ்நாட்டில் பிரம்மாண்டமாக வெளியிடுவதற்கு அவர் மற்றும் அவரது குழுவினர் செய்த உதவி மிகவும் முக்கியமானது. மேலும், OTT உரிமையை பெற்ற Amazon Prime Video மற்றும் ஆடியோ உரிமையை பெற்ற Saregama நிறுவனத்திற்கும் நன்றி. ஆந்திரா மற்றும் தெலுங்கானா பகுதிகளில் வெளியீட்டை மேற்கொண்ட Mythri Movie Makers நிறுவனத்திற்கும், கேரளாவில் வெளியீட்டு உரிமையை பெற்ற SSR Entertainment நிறுவனத்திற்கும் நன்றி.

 

அடுத்து, என் அணியைப் பற்றி சொல்ல வேண்டும். என் நெருங்கிய நண்பரும் இணை தயாரிப்பாளருமான ஜெய்காந்த் சுரேஷ், நிர்வாக தயாரிப்பாளர் விஷ்ரத் மற்றும் எங்கள் இயக்குநரும் எழுத்தாளருமான மரியா ஆகியோருக்கு என் மனமார்ந்த நன்றி. மரியா, உங்களுக்கு எதிர்காலத்தில் பெரிய சாதனைகள் காத்திருக்கின்றன என்று நம்புகிறேன்.

 

‘ஹேப்பி ராஜ்’ படத்தில் பணியாற்றிய தொழில்நுட்பக் கலைஞர்கள் மற்றும் குழுவினருக்கும் நன்றி. ஜார்ஜ் மரியன் சார் இந்தப் படத்தில் மிகவும் சிறப்பான கதாபாத்திரம் ஒன்றை செய்துள்ளார். படம் வெளியான பிறகு, அந்தக் கதாபாத்திரம் அனைவரின் மனதிலும் நிலைத்திருக்கும். படத்தின் நாயகன் ஜி.வி. பிரகாஷ் குமார் சார் குறித்து சொல்ல வேண்டும். அவர் மிகவும் பிஸியாக இருந்தபோதிலும், இந்தப் படத்திற்கு முழு ஒத்துழைப்பையும் அளித்தார். முதல் நாளிலிருந்தே எங்களை நம்பி, தேவையான நேரமும் ஆதரவையும் வழங்கினார். படத்தின் இறுதி கட்டத்திலும் அவர் காட்டிய அக்கறை எங்களுக்கு மிகுந்த உற்சாகம் அளித்தது. நாயகி ஸ்ரீ கௌரி பிரியா அவர்கள் ‘லவ்வர்’ படத்தின் மூலம் ஏற்கனவே அனைவருக்கும் தெரிந்தவர். ஆனால் ‘ஹேப்பி ராஜ்’ படத்தில் அவர் முற்றிலும் வேறுபட்ட கதாபாத்திரத்தில் நடித்துள்ளார். இந்த ஆண்டில் அவருக்கு விருதுகள் கிடைக்கும் என்று நம்புகிறேன்.

 

படத்தின் எடிட்டர் ஆர்.கே. செல்வா சார், உடை வடிவமைப்பாளர் பிரவீன், புரொடக்‌ஷன் டிசைனர் குமார் கங்கப்பன், பப்ளிசிட்டி டிசைனர் வியாக்கி, ஒளிப்பதிவாளர் மதன் கிறிஸ்டோபர் ஆகியோருக்கும் என் நன்றி. மேலும், உதவி இயக்குநர்கள் மற்றும் தயாரிப்பு அணியினரின் உழைப்பு இந்தப் படத்தை நேரத்தில் முடிக்க உதவியது.

 

என் குடும்பத்தினரான ஐஸ்வர்யா மற்றும் தாராவுக்கும் என் நன்றி. ‘ஹேப்பி ராஜ்’ ஒரு குடும்பக் கதையை மையமாகக் கொண்ட படம். இன்றைய காலத்திற்கு தேவையான ஒரு திரைப்படமாக இது இருக்கும் என்று நம்புகிறேன். அனைத்து தரப்பு மக்களும் இந்தப் படத்துடன் இணைந்து உணர்வார்கள். ஜி.வி. பிரகாஷ் குமார் சார் அவர்களின் பயணத்தில் இது ஒரு முக்கியமான படியாக அமையும் என்று நம்புகிறேன். கடைசியாக, Beyond Pictures நிறுவனம் பற்றி சொல்ல வேண்டும். திறமையான புதிய கலைஞர்களுக்கு ஒரு தளம் அமைக்க வேண்டும் என்பதே இந்த நிறுவனத்தின் நோக்கம். இயக்குநர்கள், எழுத்தாளர்கள், தொழில்நுட்பக் கலைஞர்கள் மற்றும் நடிகர்கள் ஆகியோருக்கு வாய்ப்பு வழங்கும் எண்ணத்தோடு இந்த நிறுவனம் தொடங்கப்பட்டது. ‘ஹேப்பி ராஜ்’ மூலம் இந்த நிறுவனம் நல்ல இடத்தைப் பெறும் என்று நம்புகிறேன். விரைவில் அடுத்த திட்டத்தையும் அறிவிப்போம். நன்றி.” என்றார்.

 

இணைத் தயாரிப்பாளர் ஜெய்காந்த் சுரேஷ் பேசுகையில், “அனைவருக்கும் வணக்கம். பிரஸ் மற்றும் மீடியா நண்பர்களுக்கும், இங்கு வந்திருக்கும் அனைவருக்கும் எனது மாலை வணக்கங்கள். முதலில், எங்களுடைய அழைப்பை ஏற்று இங்கு வருகை தந்துள்ள சிறப்பு விருந்தினர்கள் விஜய் சேதுபதி சார் மற்றும் கவின் அவர்களுக்கு என் மனமார்ந்த நன்றி. அவர்களின் வருகை எங்கள் படக்குழுவுக்கு மிகப்பெரிய உற்சாகத்தை அளித்துள்ளது. என் நண்பரும் தயாரிப்பாளருமான ஜெயவர்தன் அவர்கள் கூறியதுபோல், Beyond Pictures நிறுவனத்தின் இந்த முதல் முயற்சி எங்களுக்கு மிகவும் முக்கியமானது. இந்தக் கதையையும் எங்களையும் நம்பி, முதல் படத்திலேயே இவ்வளவு பெரிய ஆதரவு வழங்கிய ஜி.வி. பிரகாஷ் குமார் சார் அவர்களுக்கு மிகப்பெரிய நன்றி. நீங்கள் அளித்த அந்த நம்பிக்கையும் இடமும் தான் இந்தப் படம் இவ்வளவு சிறப்பாக உருவாக காரணமாகியுள்ளது.

 

இயக்குநர் மரியா, உங்களுடைய அர்ப்பணிப்பும் உழைப்பும் எங்களுக்கு நன்றாக தெரியும். நீங்கள் நினைத்ததை விட இந்தப் படம் இன்னும் அழகாக உருவாகியுள்ளது. ‘ஹேப்பி ராஜ்’ படத்தின் மூலம் உங்களுக்கு ஒரு சிறந்த எதிர்காலம் காத்திருக்கிறது. வாழ்த்துக்கள்.

அதேபோல், நாயகி கௌரி மேம், ஜார்ஜ் மரியன் சார், அப்பாஸ் சார், அதிர்ச்சி அருண் மற்றும் இந்தப் படத்தில் நடித்துள்ள அனைத்து நடிகர், நடிகைகளுக்கும் என் நன்றி. ஜஸ்டின் பிரபாகரன் சார் அவர்களின் இசை இந்தப் படத்திற்கு மிகப்பெரிய பலமாக அமைந்துள்ளது.

 

எங்களது நிர்வாக தயாரிப்பாளர் விஷ்ரத், எடிட்டர் செல்வா, ஒளிப்பதிவாளர் மதன், பப்ளிசிட்டி டிசைனர் வியாக்கி மற்றும் இரவு பகலாக உழைத்த அனைத்து உதவி இயக்குநர்கள் மற்றும் தொழில்நுட்பக் கலைஞர்களுக்கும் என் மனமார்ந்த நன்றிகள். படத்தை பிரம்மாண்டமாக வெளியிட ஆதரவளித்த ஏபி இன்டர்நேஷனல் சஞ்சய் வாத்வா சார், ஃபைவ் ஸ்டார் செந்தில் சார் மற்றும் அனைத்து விநியோகஸ்தர்களுக்கும், தொழில் பங்குதாரர்களுக்கும் என் நன்றி. ‘ஹேப்பி ராஜ்’ வருகிற 27ஆம் தேதி உலகம் முழுவதும் திரையரங்குகளில் வெளியாகிறது. இது ஒரு முழுமையான குடும்ப பொழுதுபோக்கு படம். அனைவரும் குடும்பத்துடன் திரையரங்கிற்கு வந்து பார்த்து உங்கள் ஆதரவை வழங்க வேண்டும் என்று கேட்டுக்கொள்கிறேன். நன்றி.” என்றார்.

 

நடிகர் மதுரை முத்து பேசுகையில், “இந்தக் கூட்டத்தில் பலருக்கு பல பெயர்கள் இருக்கின்றன. ஆனால் டைட்டிலை பார்த்தவுடன் ஒரு சந்தோஷம் வருகிறது என்றால் அது ‘ஹேப்பி ராஜ்’. ஹேப்பி ராஜுக்கு மட்டும் அல்ல, ஹேப்பி வேலுவாக இருந்தாலும் சரி, ஹேப்பி லட்சுமியாக இருந்தாலும் சரி, ஹேப்பி ஹேமலதாவாக இருந்தாலும் சரி... எல்லோருக்கும் இது ஒரு சந்தோஷமான படமாக இருக்கும். அதுதான் முக்கியம். இங்கு இருக்கும் முகங்களையும், பெயர்களையும் பாருங்கள். நம்ம ஜி.வி. பிரகாஷ் குமார் என்றாலே ஒரு வெளிச்சம். இவர்களெல்லாம் வாய்ப்பு கேட்டுக் கொண்டு வந்தவர்கள். நான் எப்படி வந்தேன் என்று நினைக்கும்போது, ஏதாவது பேச வேண்டுமே! எல்லாருடைய பெயர்களையும் மறக்காமல் சொல்ல வேண்டும் என்று மனப்பாடம் செய்து வந்தது போல இருக்கிறது.

 

அதேபோல் மரியா இளஞ்செழியன். ‘மரியா’ என்றாலே தூய்மை, அன்பு என்று அர்த்தம். ஆரம்பமே பாசிட்டிவாக இருக்கிறது. முதல் நாள் ஷூட்டிங்கில் பார்த்தபோது என்ன செய்கிறார்கள் என்று புரியவில்லை. ஆனால் முடிவில் பார்த்தபோது ‘என்ன மாதிரி வேலை செய்திருக்கிறார்கள்!’ என்று தெரிந்தது. அது எல்லாம் நல்ல விஷயம் தான். ஆடியன்ஸின் உணர்வை (pulse) ஷூட்டிங் ஸ்பாட்டிலேயே பார்த்தேன். எல்லாமே பாசிட்டிவாக இருந்தது. நான் போனவுடன் ஜி.வி சார் ‘ஒரு ஜோக் சொல்லுங்கண்ணே’ என்று கேட்பார். நான் சொன்னதும், ‘அதை விட முன்பிருந்த டென்ஷனே நல்லது’ என்று சொல்லுவார். அப்படியே நகைச்சுவையோடு தொடங்கிவிடுவோம்.

 

சில படங்களில் சில விஷயங்கள் கடைசிவரை விளக்கம் இல்லாமல் இருக்கும். அதுபோல இந்த படத்தில் நான் எதற்காக இருக்கிறேன் என்று நீங்கள் யோசிக்க வேண்டாம். நான் இருக்கிற இடமெல்லாம் நகைச்சுவை இருக்கும் என்பதுதான் முக்கியம். மரியம் ஜார்ஜ் சார் முதல் நாள் கேரவனில் என்னை பார்த்து, ‘உங்கள் காமெடி மிகவும் அருமை’ என்று பாராட்டினார். அது எனக்கு மகிழ்ச்சியாக இருந்தது. அதேபோல் கவின் பிரதர்... இங்கே இருக்கும் முகங்களைப் பாருங்கள், இந்த பாசிட்டிவிட்டிதான் திரையிலும் இருக்கும். இந்த படத்தில் நிறைய உதவி இயக்குநர்கள் இருந்தார்கள். அவர்களின் குடும்பமே வந்தாலும் ஒரு தியேட்டர் நிரம்பும் அளவுக்கு பெரிய குழு.

 

இந்த படத்தில் எனக்கு மிகவும் பிடித்தது மூன்று விஷயங்கள் – உழைப்பு, உழைப்பு, உழைப்பு. இயக்குநர் முதல் தயாரிப்பாளர் வரை அனைவரும் அதே அர்ப்பணிப்புடன் வேலை செய்துள்ளனர். மிகவும் அன்பாகவும் கவனமாகவும் நடத்தினர். அதற்காக அனைவருக்கும் நன்றி.

இந்த படத்தின் தலைப்பு itself பாசிட்டிவிட்டி தருகிறது. நகைச்சுவையும் அதே அளவில் இருக்கும். நான் டப்பிங் செய்யும்போது மிகவும் சிரித்த படம் இது தான். அந்த அனுபவத்தை நீங்கள் திரையரங்கில் பார்க்கலாம்.

 

இந்த வாய்ப்பை அளித்த இயக்குநர், தயாரிப்பாளர் மற்றும் ஜி.வி. பிரகாஷ் குமார் சார் அனைவருக்கும் எனது மனமார்ந்த நன்றி. இந்த படம் கண்டிப்பாக வெற்றி பெறும். வெற்றி விழாவில் இன்னும் நிறைய ஜோக்ஸுடன் வருகிறேன்! மொத்தத்தில் இந்த படம் ஒரு ‘ஹைலைட்’ படமாக இருக்கும். மீதியை நீங்கள் திரையரங்கில் பார்த்து ரசிக்கலாம். நன்றி, வணக்கம்.” என்றார்.

 

தயாரிப்பாளர் ஜி.கே. தமிழ் குமரன் பேசுகையில், “மிகவும் இளமையாக இருக்கும் ஒரு அணியாக இது தெரிகிறது. கண்டிப்பாக இது ஒரு வெற்றிப் படமாக அமையும் என்று நம்புகிறோம். இரண்டு நாட்களுக்கு முன்புதான் இங்கே ‘சிறை’ படத்தின் வெற்றி விழாவில் கலந்து கொண்டோம். அந்தப் படத்தில் ஜஸ்டின் பிரபாகரன் சார் இசையமைத்த ‘நீலோற்பம்’ பாடல் இன்னும் மனதில் ஒலித்துக்கொண்டே இருக்கிறது. அதுபோல இந்தப் படமும் ஒரு பெரிய வெற்றிப் படமாக அமைந்து, அதன் வெற்றி விழாவிற்கும் எங்களை அழைப்பீர்கள் என்று நம்புகிறோம். கண்டிப்பாக நாங்களும் வருவோம். நாங்கள் சமீபத்தில் தயாரிப்பாளர் சங்கத்தில் தேர்ந்தெடுக்கப்பட்டுள்ளோம். ஒரு பெரிய நம்பிக்கையுடன் எங்களைத் தேர்ந்தெடுத்துள்ளனர். தேர்தல் நடைபெற்றபோது விஜய் சேதுபதி அவர்களையும் அழைத்து, ‘நீங்களும் போட்டியிடுங்கள்’ என்று கேட்டோம். எந்தப் பொறுப்பையும் ஏற்கலாம் என்று கூறினோம். ஆனால், ‘நீங்கள் முன்னிலையில் செயல்படுங்கள், நான் பின்னால் இருந்து ஆதரவு அளிக்கிறேன்’ என்று அவர் தெரிவித்தார். சமீபத்தில் ஒரு கூட்டமும் நடத்தினோம். அதில் தயாரிப்பாளர்களுக்கு உதவும் வகையில் பல ஆக்கப்பூர்வமான திட்டங்களைப் பற்றி பேசினோம். எங்களுக்கு யாருடனும் எதிர்ப்பு எதுவும் இல்லை. அனைவருக்கும் உதவும் நோக்கத்தில்தான் செயல்படுகிறோம்.

 

இப்போது ‘சின்ன படம்’, ‘பெரிய படம்’ என்ற பிரிவு கிடையாது. நல்ல படங்கள் மட்டுமே வெற்றி பெறுகின்றன. இன்று பெரியவர்களாக உள்ள அனைவரும் ஒருகாலத்தில் அறிமுகமானவர்கள்தான். தயாரிப்பாளர்களாக இருந்தாலும், தொழில்நுட்பக் கலைஞர்களாக இருந்தாலும், அவர்கள் வளர்ந்து வந்தவர்கள் தான். அதேபோல் இந்தப் படமும் ஒரு பெரிய வெற்றிப் படமாக அமையும் என்று நம்புகிறோம். முழு குழுவினருக்கும் என் மனமார்ந்த வாழ்த்துக்கள்.” என்றார்.

 

நடிகர் ஜார்ஜ் மரியன் பேசுகையில், “பியாண்ட் பிக்சர்ஸ் பட விழாவிற்கு வருகை தந்துள்ள சிறப்பு விருந்தினர்கள் விஜய் சேதுபதி அவர்களுக்கும், கவின் அவர்களுக்கும், தயாரிப்பாளர் குழுவினருக்கும், அனைவருக்கும் என் வணக்கம். ஊடக நண்பர்களுக்கும் வணக்கம்.

இந்த ‘ஹேப்பி ராஜ்’ படத்தில் நம்முடைய நாயகன் ஜி.வி. பிரகாஷ் குமார் அவர்கள் மிகவும் சிறப்பாக நடித்துள்ளார். அவருடைய இளமைத் தோற்றம் மிகவும் கவர்ச்சியாக இருந்தது. கௌரி மற்றும் பிரியா ஆகியோரும் மிகவும் நன்றாக நடித்துள்ளனர். இந்தப் படத்தில் நடித்த அனைத்து கலைஞர்களும் சிறப்பாக செயல்பட்டுள்ளனர்.

 

இந்தப் படத்தை மரியன் அவர்கள் இயக்கியுள்ளார். படத்தை தயாரித்த ஜெயவர்தன் அவர்கள், ஜெய் மற்றும் பிரசாந்த் ஆகியோருக்கும் எனது நன்றிகள். இந்தப் படம் ஒரு நல்ல குடும்பக் கதையாக உருவாகியுள்ளது. சிறியவர்கள் முதல் பெரியவர்கள் வரை அனைவரும் மகிழ்ச்சியுடன் ரசிக்கக்கூடிய படம் இது. அனைவரும் திரையரங்கில் பார்த்து இன்புறுங்கள். நன்றி.” என்றார்.

 

நடிகர், பாடகர் கானா வினோத் பேசுகையில், “எல்லாருக்கும் வணக்கம். இங்கு வருகை தந்துள்ள அனைவருக்கும், தொழில்நுட்பக் கலைஞர்கள், அறிஞர்கள், ஊடக நண்பர்கள் அனைவருக்கும் எனது நன்றி. நீங்கள் அளித்த ஆதரவுக்கு மனமார்ந்த நன்றி. முக்கியமாக ஜி.வி. பிரகாஷ் குமார் அண்ணாவிற்கு என் சிறப்பு நன்றி. எனக்கு பல வாய்ப்புகளை வழங்கியிருக்கிறார். அவர் பெரிய இசையமைப்பாளராக இருந்தாலும், மிகவும் எளிமையாக, ஒரு நண்பரைப் போலவே பழகுகிறார். நான் எப்போது ரெக்கார்டிங் தியேட்டருக்கு சென்றாலும், மிகவும் நெருக்கமாக அணுகுவார். இந்த ‘ஹேப்பி ராஜ்’ படத்தின் மூலம், ‘பிக் பாஸ்’ நிகழ்ச்சிக்குப் பிறகு எனக்கு கிடைத்த மிகப்பெரிய வாய்ப்பு இது. அதற்காக முழு குழுவிற்கும் என் நன்றியை தெரிவிக்கிறேன்.

 

மேலும், ஜஸ்டின் பிரபாகரன் சார் அவர்களுக்கும் என் நன்றி. இந்தப் படத்தில் இரண்டு சிறந்த இசையமைப்பாளர்களுடன் பணிபுரிந்தது எனக்கு ஒரு பெருமை. இந்தப் பாடல் உருவான விதம் மிகவும் சுவாரஸ்யமானது. முதலில் பாடல் வரிகள் எழுதப்பட்டு, பின்னர் ஷூட் செய்யப்பட்டு, அதன் பின் அந்த காட்சிகளுக்கேற்ப நாங்கள் பாடலை அமைத்தோம். ஜஸ்டின் பிரபாகரன் சார் மிகுந்த கவனத்துடன் ஒவ்வொரு விஷயத்தையும் திருத்தி, சரியான வடிவத்தில் கொண்டு வந்தார்.

 

இந்தப் பாடலில் ஒவ்வொரு வரியும் ‘ஹூக் லைன்’ போல நினைவில் நிற்கும் வகையில் அமைந்துள்ளது. குறிப்பாக ‘மை பேபி’ பகுதி, ஹீரோயின் கதாபாத்திரத்திற்கேற்ற வகையில் வடிவமைக்கப்பட்டது. அது மிகவும் சிறப்பாக அமைந்துள்ளது.

மரியா சார், மிகவும் நன்றி. தயாரிப்பாளர்கள் ஜெயவர்தன் சார், ஜெய்காந்தன் சார் ஆகியோருக்கும் என் நன்றி. கவின் அவர்களுக்கும் நன்றி. இங்கு வருகை தந்த அனைவருக்கும் என் மனமார்ந்த நன்றி.

 

மணிக்கு என் சிறப்பு நன்றி. அவர் மிகவும் உழைப்பாளி. இந்தப் பாடலுக்காக அவர் எடுத்த முயற்சி மிகவும் பாராட்டத்தக்கது. இந்தப் பாடலின் ஹூக் லைன் மற்றும் நடன அசைவுகள் இன்று தமிழ்நாடு முழுவதும் பரவி வருகிறது. அந்த அளவுக்கு மக்கள் மத்தியில் இது வரவேற்பைப் பெற்றுள்ளது. இந்த வாய்ப்பை வழங்கிய முழு குழுவிற்கும் மீண்டும் ஒரு முறை என் மனமார்ந்த நன்றி. நன்றி.” என்றார்.

 

பாடலாசிரியர் கார்த்தி நேத்தா பேசுகையில், “முதலில் மிகவும் மகிழ்ச்சி. நன்றி. இயக்குநருக்கும், தயாரிப்பாளர்களான இருவருக்கும், குறிப்பாக இந்த நட்புக் குழுவிற்கும் என் மனமார்ந்த வாழ்த்துக்கள். இந்த நட்பு எப்போதும் தொடர வேண்டும் என்பதே என் விருப்பம்.

எனக்கு ஜி.வி. பிரகாஷ் குமார் சார் மற்றும் என் நண்பர் ஜஸ்டின் பிரபாகரன் இருவரிடமும் பல ஒற்றுமைகள் காணப்படுகின்றன. குறிப்பாக அவர்களின் பண்பு, மனிதநேயம் ஆகியவற்றில். அவர்கள் மனிதர்களாக இருப்பதிலிருந்தே அந்த இசை உருவாகிறது. அதுவே அவர்களின் பாடல்களில் பிரதிபலிக்கிறது. மேற்கத்திய இசையின் தாக்கம் இருந்தாலும், அவர்களின் ஒவ்வொரு பாடலிலும் இந்திய மண்ணின் ஆன்மாவும், தாளமும், பண்பும் இயல்பாக கலந்திருக்கும். அதனால்தான் அவர்களின் பாடல்கள் காலத்தையும் கடந்து நிலைத்திருக்கின்றன. மதராசப்பட்டினம் படத்தின் பாடல்கள் இன்னும் கேட்கப்படுகின்றன. அதேபோல் பண்ணையாரும் பத்மினியும் படத்தின் பாடல்களும் இன்னும் மனதில் நிற்கின்றன. இந்த ஒற்றுமை இருவரிடமும் உள்ளது.அவர்களின் இசை தொடர்ந்து இப்படியே இருக்க வேண்டும் என்று விரும்புகிறேன்.

 

இந்தப் படத்தில் பணியாற்றிய எனது நண்பர்கள் விவேக் மற்றும் சாரதி ஆகியோருக்கும் என் மனமார்ந்த வாழ்த்துக்கள். குறிப்பாக சாரதி எழுதிய ‘நீலோற்பம்’ பாடல் மிகவும் ஆழமான உணர்வை ஏற்படுத்தியது. அவருக்கு இன்னும் பல வாய்ப்புகள் கிடைக்க வேண்டும் என்று நான் விரும்புகிறேன். அவர் மிகுந்த திறமை கொண்ட பாடலாசிரியர். அதேபோல் விவேக் அவர்களுக்கும் என் மகிழ்ச்சியை தெரிவிக்கிறேன். இந்தப் படத்தில் பணியாற்றிய ஒட்டுமொத்த குழுவினருக்கும், ஒளிப்பதிவாளர், எடிட்டர் மற்றும் அனைத்து தொழில்நுட்பக் கலைஞர்களுக்கும் ஒரு ரசிகனாக என் வாழ்த்துக்கள்.

 

மரியா, உங்களைப் பார்த்தவுடன் ஒரு தனித்துவமான உணர்வு கிடைக்கிறது. நீங்கள் மிகவும் இயல்பாக, உங்கள் வழியில் பயணிக்கும் ஒரு மனிதர். அதேபோல தொடர்ந்து நல்ல, உணர்வுப்பூர்வமான படங்களை உருவாக்க வேண்டும் என்று வாழ்த்துகிறேன். மரியன் ஐயா, உங்களைப் பார்க்கும்போது எனக்கு என் தந்தை நினைவிற்கு வருகிறார். இந்தப் படத்தில் நான் எழுதிய பாடலும் என் தந்தையை நினைத்தே எழுதப்பட்டது. உங்கள் நடிப்பை நேரில் பார்க்கும்போது அந்த உணர்வு மேலும் அதிகரிக்கிறது. ஜி.வி. பிரகாஷ் குமார் சார் நடித்த காட்சிகளில், குறிப்பாக ட்ரெய்லரில் காணப்படும் உணர்வுகள், எனக்கு என் வாழ்க்கையிலிருந்த அனுபவங்களை நினைவூட்டின. இந்தப் படம் மூலம் நான் என் தந்தையிடம் மன்னிப்பு கேட்க வேண்டும் என்ற உணர்வு ஏற்பட்டது. அந்த உணர்வை அந்தப் பாடல் வெளிப்படுத்துகிறது.

பாடல் மற்றும் படம் வெளியான பிறகு அதைப் பற்றி மேலும் பேசலாம். அனைவருக்கும் என் மனமார்ந்த வாழ்த்துக்கள். நன்றி.” என்றார்.

 

நடிகர் அதிர்ச்சி அருண் பேசுகையில், “இங்கு வருகை தந்துள்ள அனைத்து இன்ஃப்ளூயன்சர்கள், ரசிகர்கள் மற்றும் முன்னிலையில் இருக்கும் பிரபலங்களுக்கு எனது மனமார்ந்த நன்றி. முதலில் சொல்ல வேண்டியது என்னவென்றால், நான் இதற்கு முன்பு இப்படிப்பட்ட ஆடியோ லான்ச் நிகழ்ச்சிகளில் கலந்து கொண்டதில்லை. இது எனக்கு முதல் அனுபவம். இந்தப் படம் எனக்கு கிடைத்தது மிகவும் மகிழ்ச்சியை அளிக்கிறது. அதே நேரத்தில், ஆரம்பத்தில் சிறிது பதட்டமும் இருந்தது. ஏனெனில் விஜய் சேதுபதி சார், கவின் சார், ஜி.வி. பிரகாஷ் குமார் சார் போன்றவர்களின் முன்னிலையில் பேசுவது ஒரு பெரிய விஷயம். இந்த நிகழ்ச்சி இவ்வளவு பிரம்மாண்டமாக இருக்கும் என்று நான் எதிர்பார்க்கவில்லை. மிகவும் சிறப்பாக ஏற்பாடு செய்திருக்கிறார்கள். அதற்கு மிகவும் சந்தோஷமாக உள்ளது.

 

முதலில் தயாரிப்பாளர் ஜெயவர்தன் சார் மற்றும் இணை தயாரிப்பாளர் ஜெய்காந்த் சார் ஆகியோருக்கு என் நன்றி. பலர் இருந்தபோதும், ‘இந்த பையன் வளரட்டும்’ என்று நினைத்து எனக்கு வாய்ப்பு அளித்தது மிகவும் பெரிய விஷயம். படப்பிடிப்பு நேரத்தில் கூட அவர்கள் தயாரிப்பாளர்களாக மட்டுமின்றி, அணி உறுப்பினர்களைப் போலவே உழைத்தார்கள். ஒவ்வொரு பணியிலும் நேரடியாக ஈடுபட்டது என்னை மிகவும் ஆச்சரியப்படுத்தியது. ஜி.வி. பிரகாஷ் குமார் சார் குறித்து சொல்ல வேண்டும். நான் சிறுவயதில் இருந்து அவருடைய பாடல்களை கேட்டு வளர்ந்தவன். அவர் எப்போதும் செயல்பாட்டில் இருக்கும் ஒரு ஆற்றல் மிகுந்த கலைஞர். தொடர்ந்து புதிய விஷயங்களை உருவாக்கிக் கொண்டே இருப்பார். அவருடன் நடித்த அனுபவம் எனக்கு மிகுந்த மகிழ்ச்சி அளித்தது. முதல் நாளே என்னை ஊக்குவித்தது எனக்கு மிகவும் உற்சாகம் தந்தது.

 

ஜார்ஜ் மரியன் சார் உடன் பணிபுரிந்தது மிகவும் சிறந்த அனுபவம். அவர் நகைச்சுவையிலும் உணர்ச்சியிலும் சமமாக திறமை கொண்டவர். கௌரி மேடம், நீங்கள் அனைவருடனும் மிகவும் எளிமையாக பழகிய விதம் மிகவும் பாராட்டத்தக்கது. நன்றி. அப்பாஸ் சார் இன்று வரவில்லை. ஆனால் அவருடைய படங்களை பார்த்து வளர்ந்த ரசிகன் நான். ‘மின்னலே’, ‘காதல் தேசம்’, ‘ஆனந்தம்’ போன்ற படங்கள் எனக்கு மிகவும் பிடித்தவை. அவரை நேரில் சந்தித்த அனுபவமும் மிகச் சிறப்பாக இருந்தது. அவருடைய மீள்வரவு மகிழ்ச்சி அளிக்கிறது. இயக்குநர் மரியா அவர்களுக்கு என் மனமார்ந்த நன்றி. பல தேர்வுகளுக்குப் பிறகு எனக்கு இந்த வாய்ப்பு கிடைத்தது. என்னை நம்பி தேர்வு செய்ததற்கு மிகவும் நன்றி. படப்பிடிப்பு முதல் டப்பிங் வரை, ஒவ்வொரு காட்சியிலும் என்னிடமிருந்து சிறந்ததை எடுத்துக்கொண்டார். மொத்தத்தில், இந்தப் படத்தில் பணிபுரிந்த அனுபவம் எனக்கு மிகவும் மகிழ்ச்சியானது. முழு குழுவிற்கும் என் மனமார்ந்த நன்றி.” என்றார்.

 

நடிகை பிரார்த்தனா நாதன் பேசுகையில், “பிரஸ் மற்றும் மீடியா நண்பர்களுக்கு எனது வணக்கம். இந்த நிகழ்ச்சியில் கலந்து கொள்வது எனக்கு மிகவும் மகிழ்ச்சியாக உள்ளது. இந்த ‘ஹேப்பி ராஜ்’ படத்தில் பணியாற்றிய அனுபவம் எனக்கு மிகவும் சிறப்பானது. குறிப்பாக ஜி.வி. பிரகாஷ் குமார் சார் உடன் வேலை செய்தது எனக்கு பெருமை அளிக்கிறது. கௌரி, நீங்கள் மிகவும் அழகாக இருக்கிறீர்கள். இந்த வாய்ப்பை வழங்கிய Beyond Pictures நிறுவனத்திற்கும் என் மனமார்ந்த நன்றி.

 

மதன், நீங்கள் சொன்னதுபோல படப்பிடிப்பு நாட்களில் ஓய்வே இல்லாமல் உழைத்தோம். மழையோ, வெயிலோ எதையும் பொருட்படுத்தாமல் தொடர்ந்து வேலை செய்தோம். அந்த நாட்களில் எனக்கு காய்ச்சலும் இருந்தது. அதுபோலும், ‘நேரம் கிடைக்கும் போது சாப்பிட்டு கொள்ளுங்கள்’ என்று கவனித்த விதம் மிகவும் நினைவில் நிற்கிறது. அது ஒரு அருமையான அனுபவமாக இருந்தது.

 

இயக்குநர் மரியா குறித்து சொல்ல வேண்டும். நான் லவ் டுடே படத்தின் போது அவரை அறிவேன். அதுவே என் முதல் படம். அதன்பிறகு ஒருநாள் அவர் என்னை அழைத்து இந்தப் படம் குறித்து பேசினார். கதையை கேட்டபோது மிகவும் பிடித்திருந்தது. ஆனால், அதே நேரத்தில் மற்றொரு படத்தின் ஒப்பந்தம் காரணமாக தேதிகளில் சிக்கல் ஏற்பட்டது. அப்போது நான் வர முடியாமல் போகலாம் என்று கூறியபோது, ‘இந்தப் படத்தின் முதல் ஷாட்டில் நீங்கள் இருக்க வேண்டும்’ என்று அவர் சொன்னது எனக்கு மிகவும் உணர்ச்சிகரமாக இருந்தது. உடனே நான் எந்த சிக்கலும் இருந்தாலும் இந்தப் படத்தில் நடிக்க வேண்டும் என்று முடிவு செய்தேன். இந்தப் படத்தில் நான் நடித்ததற்கு மிகவும் மகிழ்ச்சி. குறிப்பாக டப்பிங் பார்க்கும்போது மிகவும் சிரித்தேன். ஜி.வி. பிரகாஷ் குமார் சார் மிகவும் புத்துணர்ச்சியாக இருந்தார். காமெடி காட்சிகள் சிறப்பாக அமைந்திருந்தது. இந்தக் கதாபாத்திரத்தை எனக்கு வழங்கிய இயக்குநர் மரியாவிற்கு என் நன்றி.” என்றார்.