விஜயுடன் நடிக்காதது ஏன்? - மனம் திறந்த மீனா
Tuesday August-28 2018

90 களில் தமிழ் சினிமா மட்டும் இன்றி தென்னிந்திய சினிமாவிலும் முன்னணி ஹீரோயினாக வலம் வந்தவர் மீனா. குழந்தை நட்சத்திரமாக சினிமாவில் அறிமுகமானவர், ஹீரோயினாகவும் முன்னணி இடத்தை பிடித்தார்.

ரஜினிகாந்த், கமல்ஹாசன், சிரஞ்சீவி, மோகன்லால் என்று தென்னிந்திய சினிமாவின் முன்னணி ஹீரோக்கள் பலருடன் ஜோடியாக நடித்திருக்கும் மீனா அஜித் போன்ற அடுத்த தலைமுறை முன்னணி ஹீரோக்களுடனும் ஜோடியாக நடித்திருக்கிறார்.

ஆனால், விஜயுடன் மட்டும் அவர் ஜோடியாக நடித்ததே இல்லை. ‘ப்ரியமுடன்’, ‘ப்ரண்ட்ஸ்’ உள்ளிட்ட விஜயின் பல படங்களில் மீனாவை ஹீரோயினாக்க முயற்சிக்கப்பட்ட போதிலும்  அவர் கடைசிவரை விஜயுடன் ஜோடி சேரவில்லை. அந்த குறையை போக்குவதற்காக ’ஷாஜகான்’ படத்தில் ஒரு பாடலுக்கு மட்டும் நடனம் ஆடியிருந்தார்.

இந்த நிலையில், விஜயுடன் தான் நடிக்காதது குறித்து சமீபத்திய பேட்டி ஒன்றில் மீனா மனம் திறந்து பேசியிருக்கிறார்.

பல முன்னணி ஹீரோக்களுடன் ஜோடியாக நடித்த போதிலும் விஜயுடன் நடிக்காதது தனக்கு வருத்தம் தான் என்று கூறிய மீனா. தனது மகள் விஜய் படத்தில் நடித்த போது, அவரை மீனா சந்தித்தாராம். அப்போது தன்னுடன் நடிக்காதது குறித்து விஜய் நினைவுப்படுத்தியதோடு, “அப்போது நீங்கள் எவ்வளவு பிஸியாக இருந்தீர்கள் என்று எனக்கு தெரியும்” என்றும் கூறினாராம்.

ஏகப்பட்ட படங்களில் நடித்து வந்ததால், சரியான தேதிகள் அமையாததே விஜயுடன் நடிக்க முடியாமல் போனதற்கு காரணம், மற்றபடி எதுவும் இல்லை, என்றும் மீனா கூறியிருக்கிறார்.