முதலையுடன் சண்டை! - அதிரடியில் இறங்கிய கோலிவுட் கதாநாயகிகள்
Saturday February-09 2019

தமிழ் சினிமாவில் ஹீரோயினுக்கு முக்கியத்துவம் உள்ள படங்கள் எடுப்பதில் தயாரிப்பாளர்கள் பலர் ஆர்வம் காட்டி வருவதால், முன்னணி நடிகைகள் மட்டும் இன்றி வளரும் நடிகைகள் பலரும் இதுபோன்ற கதையம்சம் கொண்ட படங்களில் நடித்து வருகிறார்கள்.

அந்த வரிசையிலான படமாக உருவாகும் ‘கன்னித்தீவு’ படத்தில் வரலட்சுமி, சுபிக்‌ஷா, ஐஸ்வர்யா தத்தா, ஆஷ்னா சவேரி ஆகியோர் நடிக்கிறார்கள். இவர்களுடன் மொட்டை ராஜேந்திரன், சூப்பர் சுப்பராயன், சர்மிளா ஆகியோர் நடிக்க, முக்கிய கதாபாத்திரம் ஒன்றில் முன்னணி நடிகர் ஒருவரும் நடிக்க இருக்கிறார்.

கிருத்திகா புரொடக்‌ஷன்ஸ் நிறுவனம் தயாரிக்கும் இப்படத்தை, த்ரிஷாவை வைத்து ‘கர்ஜனை’ படத்தை இயக்கியுள்ள சுந்தர் பாலு இயக்குகிறார்.

இப்படத்தின் முதற்கட்ட படப்பிடிப்பு முடிவடைந்த நிலையில், அடுத்தக் கட்ட படப்பிடிப்பு கேரளாவில் நடைபெற உள்ளது. மிக பிரமாண்டமான லேக்கில் 9 அடி நீளமான முதலையுடன் வரலட்சுமி, சுபிக்ஷா, ஐஸ்வர்யா தத்தா, ஆஷ்னா சவேரி ஆகிய நான்கு கதாநாயகிகளுடன் மொட்டை ராஜேந்திரன் இணைந்து முதலையுடன் மோதுகின்றனர்.

இந்திய சினிமாவில் இதுவரை கண்டிராத வகையில் உருவாகும் முதலையுடன் சண்டை காட்சி, படத்தின் பிற்பகுதியில் வரும் என்று இயக்குநர் சுந்தர் பாலு தெரிவித்துள்ளார். இந்த சண்டை காட்சியை ஸ்டண்ட் சிவா எடுத்து வருகிறார்.

அரோல் குரோலி இசையமைக்கும் இப்படத்திற்கு சிட்டிபாபு ஒளிப்பதிவு செய்கிறார் லாரன்ஸ் கிஷோர் எடிட்டிங் செய்கிறார்.