முன்னணி ஹீரோயினுடன் ஜோடி போடும் விஜய் ஆண்டனி!
Monday September-11 2017

‘நான்’ படத்தின் மூலம் ஹீரோவான இசையமைப்பாளர் விஜய் ஆண்டனி, தொடர்ந்து ‘சலீம்’, ‘பிச்சைக்காரன்’, ’சைத்தான்’, ‘எமன்’ என தொடர்ந்து வெற்றிப் படங்களை கொடுத்து வருகிறார். அதிலும் பிச்சைக்காரன் தமிழகத்தில் மட்டும் இன்றி ஆந்திராவிலும் மிகப்பெரிய வெற்றி பெற்றது. இதன் காரணமாக தெலுங்கு சினிமாவிலும் தனது அனைத்து படங்களையும் வெளியிட விஜய் ஆண்டனி முடிவு செய்துள்ளார்.

அதன்படி தற்போது விஜய் ஆண்டனி நடிப்பில் உருவாகியுள்ள ‘அண்ணாதுரை’ தெலுங்கில் ‘இந்திரசேனா’ என்ற தலைப்பில் வெளியாகிறது. இதன் பஸ்லுக் போஸ்டரை தெலுங்கு சூப்பர் ஸ்டார் சிரஞ்சீவி அறிமுகப்படுத்தினார்.

இப்படி தொடர்ந்து வெற்றிப் படங்களை கொடுத்து வந்தாலும், விஜய் ஆண்டனியுடன் நடிக்கும் ஹீரோயின்கள் அனைவரும் அறிமுகம நடிகையாகவோ அல்லது பிரபலம் இல்லாத நடிகைகளாகவே இருக்கிறார்கள். இது குறித்து பல பேட்டிகளில் அவரிடம் கேட்டதற்கு, கதைக்கு என்ன தேவையோ அதற்கான ஹீரோயின் இருந்தால் போதும், என்று கூறிவந்தார். ஆனால், முன்னணி ஹீரோயின்களை விஜய் ஆண்டனி அனுகியதாகவும், யாரும் அவருடன் நடிக்க விரும்பவில்லை, என்றும் கூறப்படுகிறது.

இந்த நிலையில், முதல் முறையாக முன்னணி ஹீரோயின் ஒருவருடன் விஜய் ஆண்டனி ஜோடி போட போகிறார். அந்த நடிகை அஞ்சலி. கிருத்திகா உதயநிதி இயக்கும் ‘காளி’ படத்தில் தான் அஞ்சலி விஜய் ஆண்டனிக்கு ஜோடியாக நடிக்கிறார்.

குடும்ப பிரச்சினை காரணமாக கோடம்பாக்கத்தில் இருந்து அந்திராவுக்கு எஸ்கேப்பான அஞ்சலி, தற்போது தமிழ்ப் படங்களில் மீண்டும் நடிக்க தொடங்கியுள்ளார்.