முதல் முறையாக கமல் படத்தில் நடிக்கும் பிரபல காமெடி நடிகர்
Tuesday August-20 2019

கமல்ஹாசன் - இயக்குநர் ஷங்கர் கூட்டணியில் மிகப்பெரிய வெற்றி பெற்ற ‘இந்தியன்’ படத்தின் இரண்டாம் பாகம் ‘இந்தியன் 2’ என்ற தலைப்பில் உருவாகி வருகிறது. சமீபத்தில் இப்படத்தின் படப்பிடிப்பு சென்னையில் துவங்கி நடைபெற்ற நிலையில், தற்போது ராஜமுந்திரியில் நடைபெற்றுக் கொண்டிருக்கிறது.

இதில், காஜல் அகர்வால், பிரியா பவானி சங்கர், ரகுல் ப்ரீத் சிங், சித்தார்த், பாபி சிம்ஹா, சமுத்திரக்கனி உள்ளிட்ட பல முன்னணி நட்சத்திரங்கள் நடிக்கிறார்கள். தற்போது சித்தார்த், ரகுல் ப்ரீத் சிங், பிரியா பவானி சங்கர் ஆகியோர் இடம்பெறும் காட்சிகள் படமாக்கப்பட்டு வருவதாகவும், ஆகஸ்ட் 25 ஆம் தேதி முதல் கமல் சம்மந்தமான காட்சிகள் படமாக்கப்பட உள்ளதாகவும் தகவல் வெளியாகியுள்ளது.

இந்த நிலையில், இப்படத்தில் பிரபல காமெடி நடிகர் விவேக் இணைந்துள்ளதாக கூறப்படுகிறது. ஏற்கனவே கமலின் ‘பார்த்தாலே பரவசம்’ படத்தில் விவேக் நடித்திருந்தாலும், இருவருக்குமான காமினேஷன் காட்சி என்பது அப்படத்தில் ஒன்று கூட இல்லை. இதனால், விவேக்கின் 32 வருட சினிமா பயணத்தில் அவர் கமலுடன் சேர்ந்து நடிக்கவே இல்லை.

தற்போது அவர் ‘இந்தியன் 2’ படத்தில் நடிப்பது உறுதியானால், அவர் முதல் முறையாக கமலுடன் இணைந்து நடித்த படம் இதுவாகத்தான் இருக்கும்.