விக்ரம் பிரபுவின் ‘அசுரகுரு’ மார்ச் 13 ஆம் தேதி ரிலீஸ்!
Saturday February-29 2020

கதை தேர்வில் கவனம் செலுத்தி வரும் விக்ரம் பிரபுவின் நடிப்பில் உருவாகி வரும் படம் ‘அசுரகுரு’. இதில் ஹீரோயினாக மகிமா நம்பியார் நடித்திருக்கிறார். இவர்களுடன் யோகி பாபு, மனோபாலா, ஜெகன், இளங்கோ குமரவேல் உள்ளிட்ட பலர் நடித்திருக்கிறார்கள். வில்லனாக நாகிநீடு நடிக்க, முக்கிய கதாப்பாத்திரத்தில் சுபராஜு நடித்திருக்கிறார்.

ஜே.எஸ்.பி பிலிம் ஸ்டுடியோஸ் சார்பில் ஜே.எஸ்.பி.சதீஷ் தயாரித்திருக்கும் இப்படத்தின் கதை, திரைக்கதை எழுதி ராஜ்தீப் இயக்கியுள்ளார். கபிலன் வைரமுத்து, சந்துரு, மாணிக்கவாசகம் ஆகியோர் வசனம் எழுதியுள்ளனர். கணேஷ் ராகவேந்திரா இசையமைக்க, ராமலிங்கம் ஒளிப்பதிவு செய்திருக்கிறார்.

இப்படம் குறித்து கூறிய இயக்குநர் ராஜ்தீப், “இந்த உலகில் பிறந்த அனைவருக்கும் ஒரு தேடல் இருக்கும். சிலருக்கு புகழின் மீது தேடல், சிலருக்கு அதிகாரத்தின் மீது தேடல் என பட்டியல் நீண்டுக்கொண்டே போகும். ஆனால், ‘அசுரகுரு’ ஹீரோ சக்தியின் தேடல் என்பது பணம், பணம் மட்டும் தான். ஏன் இந்த தேடல், எதற்காக இந்த தேடல் என்பது தான் படத்தின் கதை.” என்றார்.

அதிரடி ஆக்‌ஷன் காட்சிகளோடு, பிரம்மாண்டமாக உருவாகியுள்ள ’அசுரகுரு’ வரும் மார்ச் 13 ஆம் தேதி உலகம் முழுவதும் வெளியாகிறது.