மீண்டும் சினிமாவுக்கு திரும்பும் ரோஜா!
Friday June-05 2020

தமிழ் மற்றும் தெலுங்கு சினிமாவின் முன்னணி கதாநாயகியாக வலம் வந்த ரோஜா, கன்னடம், மலையாளம் உள்ளிட்ட பல மொழிகளில் நடித்திருக்கிறார். திருமணத்திற்குப் பிறகு சினிமாவில் இருந்து ஒதுங்கி ஆந்திர அரசியலில் ஈடுபட்டவர், ஒய்.எஸ்.ஆர் காங்கிரஸ் கட்சி சார்பில் சட்டமன்ற தேர்தலில் போட்டியிட்டு வெற்றி பெற்றார்.

தற்போது நகரி தொகுதியின் எம்.எல்.ஏ-வாக இருக்கும் ரோஜா ஒய்.எஸ்.ஆர் காங்கிரஸ் கட்சியின் மாநில மகளிர் அணி தலைர் மற்றும் ஏ.பி.எல்.எல்.சி (APIIC) தலைவர் என முக்கிய பொருப்புகளிலும் இருக்கிறார்.

தீவிரமாக அரசியலில் கவனம் செலுத்தி வந்த ரோஜா, தற்போது மீண்டும் சினிமாவுக்கு திரும்ப இருப்பதாகவும், இந்த முறை அதிரடியான வில்லியாக அவர் களம் இறங்க இருப்பதாகவும் கூறப்படுகிறது.

தெலுங்கு சினிமாவின் முன்னணி இயக்குநர்களில் ஒருவரான சுகுமார் இயக்கத்தில், அல்லு அர்ஜுன் நடிக்கும் படம் ‘புஷ்பா’. இதில் ஹீரோயினாக ராஷ்மிகா மந்தனா நடிக்கிறார். தெலுங்கு, தமிழ், மலையாளம், கன்னடம் மற்றும் இந்தி என 5 மொழிகளில் உருவாக உள்ள இப்படத்திற்கு தேவி ஸ்ரீ பிரசாத் இசையமைக்கிறார்.

செம்மரக்கடத்தலை மையமாக வைத்து உருவாகும் இப்படத்தில் ரோஜா வில்லியாக நடிக்கிறாராம். அரசியலில் ஈடுபட்டிருந்த ரோஜாவுக்கு நடிக்க பல வாய்ப்புகள் வந்த போதிலும் அனைத்தையும் நிராகரித்து வந்தவர், இப்படத்தின் கதையும், அவரது வேடமும் சிறப்பாக இருந்ததால் நடிக்க ஒப்புக் கொண்டாராம்.