விஜய் சேதுபதியின் கதை, திரைக்கதையில் ஹீரோவாக நடிக்கும் விமல்!
Saturday October-03 2020

கொரோனாவால் நிறுத்தப்பட்ட திரைப்பட படப்பிடிப்புகள் தற்போது மீண்டும் தொடங்கியுள்ளது. அரசு விதித்திருக்கும் சில கட்டுப்பாடுகளுடன் படப்பிடிப்புகளை நடத்தி வரும் படக்குழுவினர் தகுந்த பாதுகாப்பு நடவடிக்கைகளையும் மேற்கொண்டு வருகின்றனர். இதன் மூலம் கோலிவுட் பணிகள் மீண்டும் சூடுபிடிக்க தொடங்கியுள்ளது.

அந்த வகையில், சுமார் ஒரு டஜன் படங்களை கையில் வைத்திருக்கும் விமல், விரைவில் தனது படங்களை ஒவ்வொன்றாக வெளியிட தயாராகி வருவதோடு, நடிகர் விஜய் சேதுபதி கதை, திரைக்கதை, வசனம் எழுதியுள்ள ‘குலசாமி’ படத்திலும் ஹீரோவாக நடிக்கிறார். இப்படத்தின் படப்பிடிப்பு இம்மாதம் 16 ஆம் தேதி முதல் தொடங்குகிறது. சரவண சக்தி இயக்கும் இப்படம் அதிரடி ஆக்‌ஷன் படமாக உருவாகிறது. இப்படத்துடன் சுராஜ் உதவியாளர்  ஆர்.துரை இயக்கத்தில் ’விடா முயற்சி விஸ்வரூப வெற்றி’ என்ற படத்திலும் ஒப்பந்தமாகியுள்ளார்.

இந்த புதிய படங்களின் படப்பிடிப்புகளை தொடங்குவதற்கு முன்பு, கொரோனா ஊரடங்கினால் பாதியில் நிறுத்தப்பட்ட ‘படவா’, ‘புரோக்கர்’, ‘மஞ்சள் குடை’, ‘லக்கி’ மற்றும் இயக்குநர் வேலு இயக்கத்தில் தலைப்பு வைக்காத படம், என்று கையில் இருக்கும் படங்களை விரைவாக முடித்துக் கொடுப்பதில் தீவிரம் காட்டி வருகிறார்.

சற்குணம் இயக்கத்தில் ‘எங்க பாட்டன் சொத்து’, மாதேஷ் இயக்கத்தில் ‘சண்டக்காரி’, முத்துகுமார் இயக்கத்தில் உருவாகியுள்ள ‘கன்னிராசி’ ஆகிய படங்கள் முடிவடைந்து ரிலீஸுக்கு தயார் நிலையில் உள்ளது.