அர்ஜுனின் ஆஞ்சநேயர் கோவில் கும்பாபிஷேகம்! - முதல்வரின் மனைவி பங்கேற்பு
Friday July-02 2021

தமிழ் சினிமாவின் பிரபல நடிகர்களில் ஒருவரான அர்ஜுன், தீவிர ஆஞ்சநேய பக்தர் ஆவார். ஆஞ்சநேயருக்கு கோவில் ஒன்றை கட்ட வேண்டும் என்பது அவருடைய நீண்ட நாள் கனவும் கூட. அந்த கனவை நினவாக்க, சென்னை போரூரில் உள்ள கிருகம்பாக்கத்தில் அஞ்சனாசுத ஶ்ரீ யோக ஆஞ்சநேய சுவாமி மந்திரம் என்ற பிரம்மாண்ட கோவிலை அர்ஜுன் கட்டி வந்த நிலையில், தற்போது அந்த கோவிலின் பணிகள் நிறைவடைந்துள்ளது.

இதையடுத்து கோவிலின் கும்பாபிஷேகத்தை மிக சிறப்பாக நடத்திய அர்ஜூன், கோவில் பற்றி கூறுகையில், “இந்த கோவில் என்னுடைய 17 வருட கனவு. இதற்கு ஏன் 17 வருடங்கள் ஆனது என்பதை விட அந்த நாட்கள் எனக்கு அளித்த அனுபவங்கள் முக்கியமானவை. 

தாய், துனைவி, மகள்கள் என என் குடும்பம் எனது இந்த முயற்சிக்கு உறுதுணையாக நின்றனர் என்பது எனக்கு மிகவும் பெருமையாக உள்ளது. மேலும் பலரின் ஆதரவும் என்னை மேலும் மேலும் இந்த நற்செயலை செய்ய தூண்டுதலாக இருந்தது. 

இருப்பினும் இந்த கோவிலை நான் கட்டினேன் என்பதை விட, ஒரு தெய்வீக சக்தி எனக்குள் இருந்து இந்த செயலை செய்ய தூண்டியது என்பது தான் உண்மை. 

ஶ்ரீ ஆஞ்சநேயர் சாந்தமாக அமர்ந்திருக்கும் நிலையில் இருக்கும் இந்த  ஒற்றைக்கல் சிலை (Monolithic) 180 டன் எடையுடையது. இது தான் முதல் 180 டன் எடையுடய ஶ்ரீ ஆஞ்சநேயர் சிலை என்று கூறுகின்றனர். ஶ்ரீ ராமர், விநாயகர், நாகராஜர் சன்னதிகளும் உள்ளது.

பெஜாவர் ஶ்ரீ விஷ்ணு பிரசன்னா சுவாமிகள் இந்த கோவிலின் பிரதிஷ்டை செய்து கொடுத்தார். மேலும் ஒரு சிறப்பம்சமாக பெஜாவர் ஶ்ரீ விஷ்ணு பிரசன்னா சுவாமிகள் இந்த கோவிலுக்கு வருகை தருவதற்கு முன்பு அயோத்திக்கு சென்றிருந்தார். அஞ்சனாசுத ஶ்ரீ யோக ஆஞ்சநேய சுவாமி மந்திரம் கோயிலின் பிரதிஷ்டை செய்ய விஜயம் செய்த சுவாமிகள் தன்னுடன் அயோத்தியின் மண் எடுத்து வந்திருந்தார். அந்த மண்ணின் மீது இந்த கோவிலின் ஶ்ரீ ராமர் சிலை வைக்கப்பட்டுள்ளது.” என்றார்.

விரைவில் பொதுமக்கள் தரிசனம் செய்ய திறக்கப்பட உள்ள அஞ்சனாசுத ஶ்ரீ யோக ஆஞ்சநேயசுவாமி மந்திரம் கோவிலின் கும்பாபிஷேக நிகழ்ச்சியில் முதல்வர் மு.க.ஸ்டாலினின் மனைவி துர்கா ஸ்டாலின் கலந்துக்கொண்டு ஆஞ்சநேயசுவாமியை தரிசனம் செய்தார் என்பது குறிப்பிடத்தக்கது.