’விசித்திரன்’ படத்திற்கு கிடைத்த வரவேற்பு! - தியேட்டர்கள் எண்ணிக்கை அதிகரிப்பு
Tuesday May-10 2022

இயக்குநர் பாலா தயாரிப்பில் ஆர்.கே.சுரேஷ் ஹீரோவாக நடித்திருக்கும் ‘விசித்திரன்’ படம் கடந்த வாரம் தியேட்டர்களில் வெளியாகி வெற்றிகரமாக ஓடிக்கொண்டிருக்கிறது. 

மிகப்பெரிய வெற்றி பெற்ற மலையாளப் படமான ‘ஜோசப்’ படத்தின் தமிழ் ரீமேக்கான இப்படத்தை மலையாள படத்தை இயக்கிய ஜி.பத்மகுமாரே தமிழிலும் இயக்கியுள்ளார். இதில் நாயகிகளாக பூர்ணா, மதுஷாலினி ஆகியோர் நடிக்க, பக்ஸ், இளவரசு, மாரிமுத்து உள்ளிட்ட பலர் முக்கிய கதாப்பாத்திரங்களில் நடித்திருக்கிறார்கள்.

ஜி.வி.பிரகாஷ் குமார் இசையமைத்திருக்கும் இப்படத்திற்கு மகேந்திரன் ஒளிப்பதிவு செய்திருக்கிறார். ஜான் மகேந்திரன் வசனம் எழுதியிருக்கிறார்.

உடல் உறுப்புகள் தானம் என்ற பெயரில் வியாபாரம் பேசும் மெடிக்கல் மாஃபியாக்களை நம் கண்முன் நிறுத்தியிருக்கும் இப்படம் மக்களிடமும் விழுப்புணர்வு ஏற்படுத்தியிருக்கிறது. 

பத்திரிகையாளர்கள் பாராட்டும் இப்படம் ரசிகர்களிடம் நல்ல வரவேற்பு பெற்றிருக்கிறது. அரசியல் பிரபலங்கள் திரைப் பிரபலங்கள் என பலரும் ஆர்கே. சுரேஷின் நடிப்புக்கு பாராட்டுக்களை தெரிவித்து வருகின்றனர். மேலும் பிக்பாஸ் பிரபலங்கள் ஷிவானி, பாலாஜி, ஜூலி, தாமரை உள்ளிட்டோர் தாங்கள் விசித்திரனை கண்டு வியந்தோம் என தெரிவித்தனர்.

மாயன் என்ற ஒரே கேரக்டருக்காக 80 கிலோ எடை… 90 கிலோ எடை.. 120 கிலோ எடை என தன் உடல் எடையை ஏற்றி இறக்கி தன்னை அர்ப்பணித்திருக்கிறார் ஆர்.கே.சுரேஷ்.

மலையாளத்தில் ஜோஜு ஜார்ஜ் என்பவர் தான் இந்த கேரக்டரில் நடித்திருந்தார். எனவே அவரின் சாயல் வந்துவிடக்கூடாது என்பதிலும் தான் கவனமாக இருந்ததாக தெரிவித்திருந்தார் ஆர்.கே.சுரேஷ்.

அனைத்து தரப்பினரின் பாராட்டுக்களையும் வாழ்த்துக்களையும் விசித்திரன் பெற்று வருவதால் தமிழகத்தில் சில தியேட்டர்களில் திரையிடப்படும் காட்சிகளின் எண்ணிக்கை அதிகரித்துள்ளதாக தகவல்கள் வந்துள்ளன.

ஒரு நல்ல படைப்பை கொடுத்தால் தமிழ் சினிமா ரசிகர்கள் கொண்டாடுவார்கள் என்பதற்கு ‘விசித்திரன்’ ஒரு நல்ல உதாரணம்.