4 நாட்களில் ரூ.12 கோடி வசூல்! - ‘யானை’ மூலம் வசூல் ஹீரோவான அருண் விஜய்
Wednesday July-06 2022

ஹரி இயக்கத்தில், அருண் விஜய் நடிப்பில் கடந்த ஜூலை 1 ஆம் தேதி உலகம் முழுவதும் திரையரங்குகளில் வெளியான ‘யானை’ திரைப்படம் ரசிகர்களிடம் பெரும் வரவேற்பு பெற்று வெற்றிகரமாக ஓடிக்கொண்டிருக்கிறது.

கடந்த மாதம் வெளியான ‘விக்ரம்’ படம் வசூல் ரீதியாக மிகப்பெரிய வெற்றி பெற்ற நிலையில், அப்படத்திற்குப் பிறகு வெளியான எந்த ஒரு படமும் பெரிய அளவில் வசூலிக்காத நிலையில், அருண் விஜயின் ‘யானை’ படம் அந்த குறையை போக்கி வசூலில் சக்கைப்போடு போட்டுக்கொண்டிருக்கிறது.

மாஸ் கமர்ஷியல் படங்களை அனைத்து தரப்பினருக்கும் ஏற்ற வகையில் கொடுக்க கூடிய இயக்குநரி ஹரி இயக்கத்தில் முதல் முறையாக அருண் விஜய், நடித்திருந்தாலும் படத்தில் மிகப்பெரிய அளவில் ஸ்கோர் செய்திருக்கிறார். குடும்பத்தின் நலனுக்காக போராடும் வாலிபராகவும், பெண்களை மதிக்கும் மனிதராகவும் அதே சமயம் எதிரிகளை அடித்து துவம்சம் செய்வதில் மதம் பிடித்த யானையாக மிரட்டியிருக்கும் அருண் விஜயின் நடிப்பை ஊடகங்கள் வெகுவாக பாராட்டியுள்ளது.

அதேபோல், பாடல்கள், யோகி பாபுவின் காமெடி, சண்டைக்காட்சிகளை வித்தியாசமான முறையில் படமாக்கிய விதம், நாகரீகமான காதல், குடும்ப உறவு செண்டிமெண்ட் என முழு திரைப்படமாக அனைத்து தரப்பினரையும் கவரந்திருக்கும் படம் வெளியான நாள் முதல் ஹவுஸ்புல் காட்சிகளோடு ஓடிக்கொண்டிருக்கிறது.

உலகம் முழுவதும் 1500 திரையரங்குகளில் வெளியாகியிருக்கும் ‘யானை’ வெளியான 4 நாட்களில் ரூ.12 கோடி வசூலித்திருப்பது. ‘விக்ரம்’ படத்திற்குப் பிறகு தமிழ்ப் படம் ஒன்று மிகப்பெரிய வசூலை ஈட்டியிருக்கிறது என்றால் அது ‘யானை’ திரைப்படம் மட்டுமே என்பதால், படக்குழுவினர் மகிழ்ச்சியடைந்திருக்கிறார்கள்.

மேலும், ‘யானை’ படத்தின் மூலம் வசூல் ஹீரோவாக உருவெடுத்துள்ள அருண் விஜயின் மார்க்கெட் உயர்ந்திருப்பதாகவும் சொல்லப்படுகிறது.