ஐஸ்வர்யா ரஜினிகாந்த் நடிப்பில் ரஜினிகாந்த் நடிக்கும் ‘லால் சலாம்’!
Monday November-07 2022

தனுஷ் நடிப்பில் வெளியாகி மிகப்பெரிய வெற்றி பெற்ற ‘3’ படம் மூலம் இயக்குநராக அறிமுகமான ஐஸ்வர்யா ரஜினிகாந்த், அப்படத்தை தொடர்ந்து ‘வை ராஜா வை’ என்ற படத்தை இயக்கியவர், தற்போது தனது மூன்றாவது படத்தை இயக்க தயராகிவிட்டார்.

‘லால் சலாம்’ என்ற தலைப்பில் உருவாகும் இப்படத்தில் விஷ்ணு விஷால் மற்றும் விக்ராந்த் கதையின் நாயகர்களாக நடிக்க, ரஜினிகாந்த் சிறப்பு தோற்றம் ஒன்றில் நடிக்கிறார்.

லைகா புரொடக்‌ஷன்ஸ் சார்பில் சுபாஸ்கரன் தயாரிக்கும் இப்படத்தின் துவக்க விழா பூஜையுடன் சமீபத்தில் நடைபெற்றது.  இதில் தயாரிப்பாளர் சுபாஸ்கரன், நடிகர் ரஜினிகாந்த் உள்ளிட்ட பலர் கலந்துக் கொண்டார்கள்.

விஷ்ணு ரங்கசாமி ஒளிப்பதிவு செய்யும் இப்படத்தில் ராமு தங்கராஜ் கலை இயக்குநராக பணியாற்றுகிறார். பி.பிரவீன் பாஸ்கர் படத்தொகுப்பு  செய்கிறார். 

இப்படத்தின் படப்பிடிப்பு விரைவில் துவங்க இருப்பதாக தெரிவித்த லைகா புரொடக்‌ஷன்ஸ் முதன்மை அதிகாரி ஜி.கே.எம்.தமிழ்குமரன், படத்தில் நடிக்கும் மற்ற நடிகர், நடிகைகள் விவரங்கள் விரைவில் அறிவிக்கப்படும் என்றும் கூறினார்.