விஜய் தேவரகொண்டாவின் புதிய படத்தின் வெளியீட்டு தேதி அறிவிப்பு!
Monday August-05 2024

பான் இந்தியா ஸ்டாராக வலம் வரும் விஜய் தேவரகொண்டா தற்போது ‘ஜெர்ஸ்ஸி’ மற்றும் ‘மல்லி ராவா’ படங்கள் புகழ் தேசிய விருது வென்ற இயக்குநர் கெளதம் தின்னுரி இயக்கத்தில் நடித்து வருகிறார். இன்னும் தலைப்பு வைக்கப்படாத இப்படம் தற்காலிகமாக ‘VD 12’ என்று அழைக்கப்படுகிறது.

அதிரடி ஆக்சன் என்டர்டெய்னராக உருவாகி வரும் இந்த திரைப்படம்  அனைத்து தரப்பு ரசிகர்களையும் பரவசப்படுத்தும் வகையில், பார்வையாளர்களுக்கு இதற்கு முன் எப்போதும் இல்லாத புதுமையான அனுபவத்தை வழங்குவதற்காக தயாரிப்பாளர்கள் மிகுந்த கவனத்துடனும், ஆர்வத்துடனும் அயராது உழைத்து வருகின்றனர். 

தற்போது இப்படத்தின் படப்பிடிப்பு இலங்கையின் இயற்கை எழில் சூழ்ந்த இடங்களில் நடைபெற்று வருகிறது. 60 சதவீத படப்பிடிப்பு நிறைவடைந்துள்ளதால், இந்த திரைப்படத்தை வரும் 2025 ஆம் ஆண்டு மார்ச் மாதம் 28 ஆம் தேதி அன்று வெளியிட பட குழு அறிவித்திருப்பதோடு, படத்தின் முதல் பார்வை போஸ்டர் மற்றும் தலைப்பை இம்மாதம் வெளியிட முடிவு செய்துள்ளது.

கிரிஷ் கங்காதரன் - ஜோமோன் டி. ஜான் ஆகியோர் இணைந்து ஒளிப்பதிவு செய்யும் இந்த திரைப்படத்திற்கு 'ராக் ஸ்டார்' அனிருத் ரவிச்சந்தர் இசையமைக்கிறார். தேசிய விருது பெற்ற கலைஞரான நவீன் நூலி படத்தொகுப்பு பணிகளை மேற்கொள்கிறார். 

இந்த திரைப்படத்தை சித்தாரா என்டர்டெய்ன்மென்ட் மற்றும் ஃபார்ச்சூன் ஃபோர் சினிமாஸ் ஆகிய நிறுவனங்கள் சார்பில் தயாரிப்பாளர்கள் சூரிய தேவரா நாக வம்சி மற்றும் சாய் சௌஜன்யா ஆகியோர் இணைந்து பிரம்மாண்டமான பொருட்செலவில் தயாரித்து வருகிறார்கள். இந்த திரைப்படத்தை ஸ்ரீ காரா ஸ்டுடியோஸ் வழங்குகிறது.‌