May 28, 2020 10:48 AM

’பொன்மகள் வந்தாள்’ சமூகத்தை கலங்கடிக்கும்! - பாரதிராஜா பாராட்டு

’பொன்மகள் வந்தாள்’ சமூகத்தை கலங்கடிக்கும்! - பாரதிராஜா பாராட்டு

ஜோதிகா நடிப்பில் அறிமுக இயக்குநர் ஜே.ஜே.பெட்ரிக் இயக்கத்தில் உருவாகியுள்ள படம் ‘பொன்மகள் வந்தாள்’. நடிகர் சூர்யாவின் 2டி எண்டர்டெயின்மெண்ட் நிறுவனம் தயாரித்திருக்கும் இப்படம் நாளை ஒடிடி தளமான அமேசான் பிரைமில் ரிலீஸ் ஆகிறது. 

 

நேரடியாக ஒடிடி தளத்தில் ரிலீஸ் ஆகும் முதல் தமிழ்த் திரைப்படம் என்ற பெருமையை பெற்றிருக்கும் இப்படத்தில் ஜோதிகா முதல் முறையாக வழக்கறிஞர் வேடத்தில் நடித்திருப்பதோடு, பாக்யராஜ், பிரதாப் போத்தன், பார்த்திபன், தியாகராஜன் உள்ளிட்ட பலர் முக்கிய கதாப்பாத்திரங்களில் நடித்திருக்கிறார்கள்.

 

இந்த நிலையில், இப்படத்தின் சிறப்பு காட்சியை பார்த்த இயக்குநரும் நடிகருமான பாரதிராஜா, ”‘பொன்மகள் வந்தாள்’ சமூகத்தை கலங்கடிக்கும்” என்று பாராட்டியுள்ளார்.

 

இது குறித்து அவர் தனது சமூக வலைதளப் பக்கத்தில் வெளியிட்டுள்ள பதிவில், “அரியாத வயதில் காமத்தை சுமந்து, வெளியில் சொல்லா முடியா வாழும், பெண்களுக்காக வந்திருக்கிறாள் இந்த பொன்மகள். இது பெண்களுக்கான படம் அல்ல, பாலியல் குற்றங்கள் செய்பவர்களுக்கான ஒரு பாடம். இயக்குநரின் இயக்கமும், ஜோதிகா அவர்களின் உணர்ச்சி் சார்ந்த நடிப்பின் இறுதிக்காட்சிகள் கண்களை கலங்கடித்து விட்டது. இந்த ’பொன்மகள் வந்தாள்’ கண்டிப்பாக சமூகத்தை கலங்கடிக்கும்.” என்று தெரிவித்துள்ளார்.

 

‘பொன்மகள் வந்தாள்’ படத்தின் டிரைலரை இதுவரை சுமார் 2 கோடிக்கும் அதிகமானவர்கள் பார்த்திருக்கிறார்கள் என்பது குறிப்பிடத்தக்கது.