இந்தியாவின் முன்னணி தமிழ் தனியார் தொலைக்காட்சியும், உலகின் மிக அதிகமாக பார்வையிடப்படும் தமிழ் தொலைக்காட்சி சேனலாகவும் திகழும் சன் டிவி, தனது பெருமைக்கு மேலும் ஒரு மகுடம் சூட்டிக்கொண்டுள்ளது. 

ஆம், உலகளவில் மிகவும் பிரபலமான இந்த தொலைக்காட்சி நெட்வொர்கின் யூடியுப் சேனல், தற்போது 30 மில்லியன் சப்ஸ்கிரைபர்களை பெற்றுள்ளது. இந்த சாதனையில் ஆச்சரியம் ஏதுமில்லை. ஏனெனில் சன் டிவி-யின்  யூடியுப் சேனலில் தினமும் 100-க்கும் மேற்பட்ட வீடியோக்கள் பதிவேற்றம் செய்யப்படுகின்றன. இதில் சன் டிவி-யில் ஒளிபரப்பப்படும் பல பிரபலமான நிகழ்ச்சிகளின் வீடியோக்கள் அடங்கியுள்ளன, உலகம் முழுவதும் பல கோடி ரசிகர்களை, இந்த நிகழ்ச்சிகள் ஈர்த்து வருகின்றன.

இதற்கு மேலாக, சன் பிக்சர்ஸ் தயாரிக்கும் திரைப்படங்களின் பாடல்கள், டிரைலர்கள் மற்றும் டீசர்களும் இந்த பிரபலமான நெட்வொர்கின் யூடியுப் சேனலில் பிரத்யேகமாக வெளியிடப்படுகின்றன.

சன் டிவி யூடியுப் சேனலில் பல வீடியோக்கள் பல  வாரங்களாக டிரெண்டாகி வந்துள்ளன என்பதும் குறிப்பிடத்தக்கது, உதாரணமாக, விஜய் நடித்த ‘பீஸ்ட்’ படத்தின் ‘அரபிக் குத்து’ பாடலும், ரஜினிகாந்த் நடித்த ‘ஜெயிலர்’ படத்தின் ‘காவாலா’ பாடலும் இதில் குறிப்பிடத்தக்கவை. இதில் முன்னோடியான ‘அரபிக் குத்து’ பாடல் 700 மில்லியன் பார்வைகளைத் தாண்டியது, ‘காவாலா’ பாடல் 300 மில்லியனுக்கும் அதிகமான பார்வைகளை பெற்றுள்ளது!

உலகளாவிய அளவில் பெரும் எண்ணிக்கையிலான ரசிகர்களைக் கொண்டுள்ள சன் டிவி யூடியுப் சேனல், தினமும் கோடிக்கணக்கான பார்வைகளைப் பெற்று வருகிறது. ஒவ்வொரு நாளும் புதிய ஃபாலோயர்ஸை இணைத்துக் கொண்டு, ஏற்கனவே இணைந்திருக்கும் ரசிகர்களின் நம்பிக்கையையும் நிலைநிறுத்தி வருகின்றது.